3 qohumunun ölümünə səbəb olan sürücüyə - Bu cəza verildi

Kürdəmirdə 3 nəfərin ölümü ilə nəticələnən yol-nəqliyyat hadisəsi üzrə açılmış cinayət işi üzrə məhkəmə prosesi başa çatıb.

"Qafqazinfo" xəbər verir ki, Lənkəran Ağır Cinayətlər Məhkəməsində rayon sakini 1992-ci il təvəllüdlü Əflatun Əflan oğlu Umudova hökm oxunub.

Bildirilib ki, hadisə ötən ilin iyun ayında baş verib. Əflatun Sumqayıtda yaşayırmış və hadisə ərəfəsində Qurban bayramı ilə əlaqədar rayona gedib. O, qohumları ilə Cəyli kəndindən rayon mərkəzinə gedərkən idarə etdiyi "Mercedes" markalı avtomobili aşırıb.

Nəticədə avtomobildə olan sərnişinlər - 1984-cü il təvəllüdlü Ceyhun Ağanəzər oğlu Xanalıyev, 1993-cü il təvəllüdlü Toğrul Hikmət oğlu Xanalıyev və 1982-ci il təvəllüdlü Süleyman Qarakişi oğlu Əhmədov hadisə yerində vəfat ediblər.

Həmin şəxslərdən Ceyhun sürücünün dayısı oğlu olub. Ceyhun həm də Süleymanla bacanaq olub. Toğrul isə sürücünün sinif yoldaşı imiş. Onların valideynləri əmiqızı-əmioğlu imiş.

Məhkəmədə ölən şəxslərdən ikisinin ailəsi sürücüdən şikayətçi olmayıb, digər ailə isə onun həbs olunmasını tələb edib.

Sürücü də qəzanın baş verməsində özünü günahkar bilib.

Məhkəmə Əflatun Umudova 3 il sürücülük hüququndan məhrum edilməklə 5 il azadlıqdan məhrumetmə cəzası təyin edib. Lakin təqsirləndirilən şəxsin cəzasını məntəqə tipli müəssisədə çəkməsi hökmdə vurğulanıb.

Qeyd edək ki, məntəqə tipli müəssisədə cəza çəkən məhkumlar bəzi hallarda oranı tərk edə bilərlər.

Telegramda izləyin