"Prezident İlham Əliyevin təqdim etdiyi Dövlət Proqramı ölkənin su strategiyasında yeni, daha dayanıqlı mərhələnin əsasını qoyur" - DEPUTAT

"Prezident İlham Əliyevin sədrliyi ilə 12 yanvar tarixində keçirilmiş "Bakı şəhərində və Abşeron yarımadasında su təchizatı, yağış və tullantı suları sistemlərinin təkmilləşdirilməsinə dair 2026-2035-ci illər üçün Dövlət Proqramı"na həsr olunan müşavirə müasir Azərbaycan dövlətinin infrastruktur siyasətində keyfiyyətcə yeni mərhələnin başlanğıcı kimi dəyərləndirilə bilər", - bunu Sonxeber.az -a açıqlama verən deputat Şahin Seyidzadə deyib:

"Dövlət başçısının çıxışı yalnız konkret bir proqramın təqdimatı deyil, son iyirmi ildə həyata keçirilmiş genişmiqyaslı infrastruktur islahatlarının məntiqi yekunu və növbəti onillik üçün strateji yol xəritəsidir. Son illər ərzində Azərbaycanda icra olunmuş regional inkişaf proqramları ölkənin sosial-iqtisadi həyatında köklü dəyişikliklərə səbəb olmuşdur. Beşillik dövrləri əhatə edən bu proqramlar nəticəsində elektrik enerjisi, qazlaşma, yol infrastrukturu, su təchizatı kimi əsas sahələrdə uzun illər mövcud olmuş problemlər mərhələli şəkildə aradan qaldırılmışdır. Prezident İlham Əliyevin vurğuladığı kimi, bu gün Azərbaycan enerji generasiya gücü baxımından tələbatını tam ödəməklə yanaşı, artıq ixracatçı ölkəyə çevrilmişdir. Vaxtilə enerji qıtlığı yaşayan, hətta elektrik enerjisini idxal edən ölkənin bu gün regionun enerji təhlükəsizliyinə töhfə verən aktora çevrilməsi ardıcıl və uzaqgörən siyasətin nəticəsidir. Eyni uğurlu yanaşma qaz təchizatı sahəsində də özünü göstərir. Əhalinin 96 faizinin təbii qazla təmin olunması təkcə sosial rifah göstəricisi deyil, həm də milli enerji təhlükəsizliyinin möhkəmləndirilməsidir. Azərbaycan bu gün qaz ixrac edən, onlarla ölkənin enerji balansında mühüm yer tutan dövlətdir. Bu fakt, daxili infrastrukturun gücləndirilməsi ilə xarici iqtisadi strategiyanın vəhdət təşkil etdiyini göstərir. Avtomobil yollarının inşası və yenidən qurulması sahəsində görülən işlər də regional inkişafın mühüm dayağıdır. Magistral və kənd yollarının, körpülərin, tunellərin tikintisi ölkənin vahid iqtisadi məkan kimi formalaşmasına xidmət edir. Xüsusilə işğaldan azad edilmiş ərazilərdə paralel şəkildə həyata keçirilən enerji, su, yol və kommunikasiya layihələri bu torpaqların qısa müddətdə dirçəldilməsinə imkan yaradır. Su təhlükəsizliyi məsələsi Prezident İlham Əliyevin çıxışında xüsusi yer tutur. Son iyirmi ildə dörd iri su anbarının inşa edilməsi, onların ümumi potensialının 500 milyon kubmetrdən artıq olması ölkənin həm içməli su, həm də suvarma ehtiyaclarının təminatında həlledici rol oynayır. "Taxtakörpü" və "Şəmkirçay" su anbarları kimi strateji obyektlər tikilməsəydi, bu gün Bakı və qərb bölgələrinin su təchizatı ciddi risk altında ola bilərdi. Eyni zamanda, "Ceyranbatan" su anbarının tam yenidən qurulması və müasir təmizləyici qurğularla təchiz edilməsi paytaxtın dayanıqlı su təminatının əsas sütunlarından biridir. İşğal dövründə Ermənistan tərəfindən həyata keçirilmiş su terroru faktları Prezident İlham Əliyevin çıxışında açıq şəkildə ifadə olunmuşdur. "Sərsəng" və "Suqovuşan" su anbarlarının sudan siyasi və ekoloji silah kimi istifadəsi region üçün ağır nəticələr doğurmuşdur. Bu gün həmin anbarların yenidən qurulması, Füzuli, Ağdam, Laçın və digər rayonlarda su infrastrukturunun bərpası Azərbaycanın suverenliyinin real məzmunla doldurulduğunu göstərir. Dövlət Proqramının əsas hədəflərindən biri Bakı şəhəri, Sumqayıt və Abşeron rayonunun dayanıqlı içməli su ilə təmin edilməsidir. 2035-ci ilə qədər icra olunacaq proqramın genişmiqyaslı olması onun uzunmüddətli və sistemli yanaşma üzərində qurulduğunu sübut edir. Maliyyələşmənin həm dövlət büdcəsi, həm də xarici kreditlər hesabına həyata keçirilməsi Azərbaycanın sağlam fiskal mövqeyindən irəli gəlir. Xarici borcun ÜDM-ə nisbətdə aşağı səviyyədə olması ölkəyə əlavə maliyyə imkanları açır. Proqram çərçivəsində 30-a yaxın yeni su anbarının tikilməsi, sayğaclaşdırmanın 100 faizə çatdırılması, fasiləsiz içməli su ilə təmin olunan əhalinin payının 95 faizə yüksəldilməsi nəzərdə tutulur. Su itkilərinin hazırkı 40-45 faiz səviyyəsindən kəskin azaldılması da əsas prioritetlərdəndir. Bu, mövcud resurslardan daha səmərəli istifadəyə şərait yaradacaq. Yağış sularının idarə olunması və kanalizasiya sistemlərinin genişləndirilməsi Bakı üçün həyati əhəmiyyət daşıyır. 30 küçədə yeni kollektor şəbəkəsinin qurulması, əhalinin 95 faizinin kanalizasiya xidməti ilə əhatə olunması şəhər infrastrukturunun dayanıqlığını artıracaq. Eyni zamanda, dənizə buraxılan suların tam təmizlənməsi, Hövsan sutəmizləyici stansiyasının modernləşdirilməsi Xəzər dənizinin ekoloji mühafizəsinə xidmət edəcək. Abşeron yarımadasında ilk dəfə duzsuzlaşdırma zavodunun tikilməsi isə innovativ yanaşmanın bariz nümunəsidir. Xarici investisiyalar hesabına həyata keçiriləcək bu layihə Bakının su mənbələrinin şaxələndirilməsinə, su təhlükəsizliyinin möhkəmləndirilməsinə imkan verəcək. Beləliklə, Prezident İlham Əliyevin təqdim etdiyi Dövlət Proqramı ölkənin su strategiyasında yeni, daha dayanıqlı və çevik mərhələnin əsasını qoyur"

Telegramda izləyin