"Ermənistan ardıcıl olaraq əsas tərəfdaşlarını itirir - Rusiya küsüb, İran narahatdır" - AÇIQLAMA

Ermənistan heç vaxt İrana qarşı heç bir addım atmayıb və atmayacaq da.

Bu barədə Ermənistan parlamentinin sədri Alen Simonyan bildirib.

"Ermənistan İrana qarşı proseslərə cəlb edilməyəcək", - deyə Simonyan İranın İrəvandakı səfiri Xəlil Şirqolaminin Ermənistanın İrana düşmən qüvvələrin mərkəzinə çevrildiyi barədə səsləndirdiyi fikirləri şərh edərkən deyib.

Onun sözlərinə görə, o Tehranın "Tramp marşrutu" (TRIPP) layihəsi ilə bağlı narahatlığını əsassız hesab edir. "TRIPP, İran da daxil olmaqla, regionun bütün ölkələri üçün böyük iqtisadi imkanlar yaradacaq", - parlament sədri deyib.

"Ermənistan parlamentinin sədri Alen Simonyanın İrana qarşı heç bir addım atmayacaqlarına dair bəyanatı regiondaki geosiyasi gərginliyin və Ermənistanın çətin tarazlama aktının növbəti göstəricisidir", - bunu Sonxeber.az -a açıqlama verən politoloq Tural İsmayılov deyib:

"Ancaq bu vəziyyətdə hər iki tərəfin problemli yanaşması var. İranın səfiri Xəlil Şirqolaminin Ermənistanın düşmən qüvvələrin mərkəzinə çevrilməsi barədə açıq və sərt bəyanatları artıqlıdır və diplomatik normalardan kənara çıxır. Kiçik qonşu ölkəyə belə şəkildə açıq təzyiq göstərmək, onu təhdid retorikaları ilə hədələmək konstruktiv deyil. İran özünü regional hegemon kimi aparır və Ermənistanın müstəqil xarici siyasət seçimi hüququnu demək olar ki, tanımır. Bu, neokolonial yanaşmadır.
TRIPP layihəsinə İranın qarşı çıxması da problem yaradır. Əgər layihə həqiqətən regional iqtisadi inteqrasiya və inkişaf məqsədi daşıyırsa, İranın konstruktiv iştirak etməsi və ya öz alternativini təklif etməsi lazımdır. Sadəcə "xeir" demək və qonşunu hədələmək həll yolu deyil. İran öz geosiyasi paranoyasına əsir olub və hər regional təşəbbüsü özünə qarşı sui-qəsd kimi görür. Bu isə İranı təcrid edir və qonşularını məhz İranın qorxduğu qüvvələrin qucağına aparır.
Digər tərəfdən, Ermənistanın yanaşması da tənqiddən azad deyil. Paşinyan hökuməti son illərdə xarici siyasətdə ciddi bacarıqsızlıq nümayiş etdirib. Bir tərəfdən Rusiya ilə münasibətlər pisləşib, KTMT-dən faktiki çıxış gündəmə gəlib. Digər tərəfdən, ABŞ və NATO ilə əməkdaşlıq intensivləşib, Fransa ilə silah müqavilələri bağlanıb. İndi isə İran narahat olub. Ermənistan özünü hamıdan uzaqlaşdıran siyasət aparır və bu, diplomatik iflasın əlamətidir. Əslində Ermənistan özünü çox böyük oyunçu hesab edir, amma reallıq fərqlidir. Kiçik ölkə böyük güclər arasında manevr edə bilər, amma bunun üçün diplomatik ustalıq lazımdır. Ermənistan isə ardıcıl olaraq əsas tərəfdaşlarını itirir - Rusiya küsüb, İran narahatdır. İranın təzyiq diplomatiyası da, Ermənistanın ziddiyyətli və qeyri-ardıcıl xarici siyasəti də problemlidir. İran daha konstruktiv və hörmətə əsaslanan yanaşma sərgiləməlidir".

Telegramda izləyin