"Diplomatik praktikada belə bəyanatlar daha çox siyasi təzyiq aləti kimi qiymətləndirilir" - DEPUTAT

"ABŞ Prezidenti Donald Trampın ünvanına yönələn təhdidlərin davam edəcəyi təqdirdə İrana qarşı sərt cavab veriləcəyini bəyan etməsi mövcud vəziyyəti daha da gərginləşdirir".

Bunu Sonxeber.az-a Milli Məclisin deputatı Müşfiq Cəfərov danışıb.

O, açıqlamasında qeyd edib ki, Trampın açıqlaması birbaşa hərbi əməliyyat elan etməsə də, "ölkənin tam məhvi" kimi ifadələr hərbi güc tətbiqi ritorikasına yaxınlaşır:

" Diplomatik praktikada belə bəyanatlar daha çox siyasi təzyiq aləti kimi qiymətləndirilir. ABŞ rəhbərliyi bu cür açıqlamalarla həm daxili auditoriyaya güclü lider obrazı təqdim edir, həm də qarşı tərəfi çəkindirici psixoloji təsir altına almağa çalışır. Bu ritorika gərginliyin azaldılmasına deyil, əksinə, qarşılıqlı etimadsızlığın dərinləşməsinə xidmət edir və diplomatik kanalların azalması riskini artırır.

Düşünürəm ki, tezliklə hər iki tərəf qarşılıqlı təhdid və tənqiddən əl çəkməli, real və faydalı diplomatiyaya üstünlük verməlidir".

Vüsalə İbrahimli

Telegramda izləyin