"Qonşularımızla münasibətlərin inkişafı regionumuza dayanıqlı sülh gətirir" - DEPUTAT

"Prezident İlham Əliyevin uzaqgörən daxili və xarici siyasəti Azərbaycanı dünya siyasi sisteminin etibarlı və nüfuzlu tərəfdaşına çevirmişdir. Azərbaycan körpüləri yandıran deyil, körpülər quran ölkədir. Bu baxımdan son 5 ildə yaratdığımız yeni reallıq regionumuza beynəlxalq marağın artmasına və ölkəmizlə əməkdaşlıq etmək istəyən dövlətlərin sayının sürətlə çoxalmasına yol açmışdır".

Bu sözləri Sonxeber.az-a Milli Məclisin deputatı Azər Badamov danışıb.

O, açıqlamasında qeyd edib ki, Azərbaycan formalaşan yeni dünya nizamında özünəməxsus yerə malikdir:

"Bu baxımdan Prezident İlham Əliyevin Davosa səfəri və səfər çərçivəsində keçirdiyi görüşlər Azərbaycanın bu gün dünya ölkələri arasında daha çox parıldadığını bir daha təsdiqləmiş oldu. ABŞ Prezidenti Donald Trampın Davosda keçirdiyi iki görüşdən birinin Azərbaycan lideri ilə baş tutması ölkəmizin dünyanın bir nömrəli dövləti ilə strateji tərəfdaş olduğunu bir daha təsdiq etmiş oldu. O cümlədən Qəzza Sülh Şurasının təsis tədbirində iştirakımız ölkəmizin dünyada baş verən prosesləri yalnız izləyən mövqedə dayanmadığını, məhz yeni nizamın formalaşmasında iştirakçı olduğunu təsdiqləmiş oldu. Bu gün Azərbaycan regional və qlobal dövlətlərlə qarşılıqlı fayda və hörmət əsasında əməkdaşlığı davam etdirməyə açıqdır. Amma ölkəmizə yuxarıdan aşağı baxmağa çalışan və 2020-2023-cü illərdə regionumuzda yaratdığımız yeni status-kvonu qəbul etmək istəməyənlərə də cavabımızı gecikdirmirik".

Deputat onuda vurğuladı ki, bəli, ölkəmiz xarici investisiyalara açıqdır və yeni əməkdaşlıqlar qurur:

"Eyni zamanda reallaşdırdığımız regional layihələrlə dünya ölkələri arasında əməkdaşlığın qurulmasına töhfə veririk. Bu baxımdan həyata keçirdiyimiz iqtisadi layihələr dünya ölkələri ilə siyasi münasibətlərin daha da möhkəmlənməsinə yol açmışdır. Azərbaycan həm qonşu ölkələrlə, həm də uzaqda yerləşən dövlətlərlə münasibətlərini genişləndirir. Qonşularımızla münasibətlərin inkişafı regionumuza dayanıqlı sülh gətirir. Bu baxımdan 30 il düşmən olmuş Ermənistana da yollarımızı açmışıq və kritik əhəmiyyətli neft məhsullarımızın ixracına başlamışıq. Bu baxımdan Azərbaycan dünyada ədalət üzərində möhkəmlənən sülh nümunəsi yaradan nadir ölkələrdəndir".

Vüsalə İbrahimli

P.S. Yazı Azərbaycan Respublikası Medianın İnkişafı Agentliyinin maliyyə dəstəyi ilə "Azərbaycan Respublikasının dünya birliyinə inteqeasiyası, region ölkələri və digər dövlətlərlə, beynəlxalq təşkilatlarla əməkdaşlığının inkişaf etdirilməsi" mövzusuna uyğun olaraq dərc edilir

Telegramda izləyin