"Region ölkələri ilə əməkdaşlıq məsələsində də Azərbaycan təşəbbüskar mövqedə çıxış edir" - AÇIQLAMA

"Azərbaycan Respublikasının dünya birliyinə inteqrasiyası bu gün artıq sadəcə xarici siyasət kursu deyil, dövlətin strateji inkişaf modelinin əsas sütunlarından biridir. Prezident İlham Əliyevin ardıcıl, praqmatik və milli maraqlara söykənən diplomatiyası Azərbaycanın beynəlxalq münasibətlər sistemində etibarlı tərəfdaş, məsuliyyətli aktor kimi mövqeyini möhkəmləndirib. Cənab Prezidentin son Davos görüşləri bir daha göstərdi ki, Azərbaycan qlobal gündəmin kənarında qalan ölkə deyil, əksinə, enerji təhlükəsizliyi, nəqliyyat-logistika zəncirləri, yaşıl keçid və regional sabitlik kimi mövzularda söz sahibi olan dövlətdir. Davos platformasında aparılan təmaslar Azərbaycanın Avropa İttifaqı, Asiya və Yaxın Şərq ölkələri ilə iqtisadi-siyasi əlaqələrinin yeni mərhələyə qədəm qoyduğunu təsdiqlədi".

Bu fikirləri Sonxeber.az-a Səs qəzetinin baş redaktoru, siyasi ekspert Bəhruz Quliyev deyib.

Ekspert qeyd edib ki, region ölkələri ilə əməkdaşlıq məsələsində də Azərbaycan təşəbbüskar mövqedə çıxış edir:

"Cənubi Qafqazda sülh, təhlükəsizlik və qarşılıqlı faydaya əsaslanan əməkdaşlıq modeli məhz Azərbaycanın irəli sürdüyü konsepsiyalar üzərində formalaşır. Azərbaycan artıq nəinki regional proseslərin iştirakçısı, həm də bu proseslərin memarı kimi çıxış edir. Bu isə ölkəmizin artan siyasi çəkisinin və beynəlxalq etimadının göstəricisidir.

"Digər dövlətlər və beynəlxalq təşkilatlarla münasibətlərdə balanslı və milli maraqlara söykənən siyasət xüsusi əhəmiyyət daşıyır. Azərbaycan nə bir qütbün təsiri altına düşür, nə də kənar diktələrlə hərəkət edir. BMT, Qoşulmama Hərəkatı, İslam Əməkdaşlıq Təşkilatı, Avropa strukturları və digər beynəlxalq platformalarda ölkəmizin mövqeyi ardıcıl, prinsipial və milli maraqlara əsaslanan xətt kimi qəbul olunur.

Azərbaycanın dünya birliyinə inteqrasiyası formal bəyanatlarla deyil, real layihələr, konkret təşəbbüslər və nəticəyə hesablanmış diplomatiya ilə ölçülür. Davos görüşləri isə bir daha sübut etdi ki, Prezident İlham Əliyevin rəhbərliyi altında Azərbaycan qlobal siyasi və iqtisadi proseslərdə müşahidəçi deyil, oyunun qaydalarını müəyyən edən tərəflərdən biridir", - deyə siyasi şərhçi əlavə edib.

Telegramda izləyin