Kömək üçün gəldilər, söyüş eşidəndə sərxoş sürücünü döydülər - VİDEO

Nevşehirdə baş verən yol-nəqliyyat hadisəsindən sonra hadisə yerinə kömək üçün gələn şəxslər sərxoş sürücünü döyüb.

Sonxeber.az türk mediasına istinadən xəbər verir ki, hadisə gecə saatlarında Esentepe məhəlləsi, Ürgüp prospektində yerləşən Balonlu yolayrıcında qeydə alınıb. Məlumata görə, 34 BLM 448 dövlət nömrə nişanlı avtomobilin sürücüsü Mervenur A. svetoforun qırmızı işığında dayanıb. Eyni istiqamətdə hərəkətdə olan 38 ALK 573 nömrəli avtomobilin sürücüsü Feridun Y. isə vaxtında dayana bilməyərək qarşıdakı nəqliyyat vasitəsinə çırpılıb.

Qəzadan sonra tərəflər avtomobildən düşərək mübahisə etməyə başlayıb. Hadisəni görən vətəndaşlar da kömək məqsədilə maşınlarından eniblər. Bu zaman sərxoş olduğu bildirilən sürücü Feridun Y. həm qarşı tərəfə, həm də köməyə gələn insanlara qarşı nalayiq ifadələr işlədib. Nəticədə mübahisə qısa müddətdə davaya çevrilib. Vətəndaşlar təhqirlərə görə sürücünü və onun yanında olan şəxsi döyərək hadisə yerindən uzaqlaşıblar.

Hadisə barədə məlumat daxil olduqdan sonra əraziyə təcili tibbi yardım və polis əməkdaşları cəlb olunub. Zərərçəkən sürücü Mervenur A. bildirib ki, qarşı tərəf əvvəlcə sürücü olduğunu inkar edib, polis çağırılmasına mane olmağa çalışıb və daha sonra onu və ailə üzvlərini hədələyib.

Sərxoş sürücü ilkin olaraq alkoqol testindən keçməkdən imtina edib. Daha sonra təcili yardım avtomobilində testdən keçməyə cəhd etsə də, buna nail ola bilməyib. Döyülən sürücü və onun dostu ilkin tibbi yardımdan sonra Nevşehir Dövlət Xəstəxanasına yerləşdirilib.

Hadisə nəticəsində sərxoş sürücüyə 25 min lirə məbləğində inzibati cərimə tətbiq olunub, sürücülük vəsiqəsi 6 ay müddətinə əlindən alınıb. Həmçinin avtomobilin istismarına da qadağa qoyulub.

Telegramda izləyin