Səssizlik hamını qorxuya saldı: Qapı sındırıldı, yaşlı qadın sağ tapıldı

Avcılar rayonunda 13 iti ilə yaşayan 65 yaşlı Gülcihan Mutlu ilə əlaqə saxlaya bilməyən qonşuları və yaxınları narahat olaraq aidiyyəti qurumlara məlumat veriblər.

Sonxeber.az türk mediasına istinadən xəbər verir ki, hadisə Cihangir Mahallesi ərazisində yerləşən yaşayış binasında baş verib. Qonşular Mutlunun qapısını dəfələrlə döysələr də cavab ala bilməyiblər. Telefon zənglərinə də cavab verilmədikdə, onlar 112 xidmətinə müraciət ediblər.

Hadisə yerinə polis, xilasedicilər və tibb işçiləri cəlb olunub. Avcılar Emniyet Müdürlüğü əməkdaşları və digər qurumların nümayəndələri mənzilin qapısını dəfələrlə döysələr də nəticə əldə olunmayıb. Qadının həyatından şübhələnildiyi üçün qapının sındırılmasına qərar verilib.

Qapı sındırıldıqdan sonra səslərə oyanan Gülcihan Mutlu "Nə baş verir?" deyərək vəziyyətə reaksiya göstərib. Onun sağ olduğunu görən qonşuları və yaxınları isə rahat nəfəs alıblar.

Mütəxəssislər belə hallarda vaxtında məlumat verilməsinin vacibliyini vurğulayır və xüsusilə tək yaşayan yaşlı şəxslərlə mütəmadi əlaqə saxlanılmasını tövsiyə edirlər.

Telegramda izləyin