Tur şirkəti 200 nəfəri Kəbə ziyarəti adı ilə aldadıb, pullarını oğurlayıb

Türkiyənin Sakarya vilayətinin Akyazı rayonunda təxminən 200 nəfər Kəbə ziyarəti üçün ödədikləri pulu geri ala bilmədiklərini iddia edərək polisə müraciət edib.

Sonxeber.az türk mediasına istinadən xəbər verir ki, sözügedən şəxslər Kəbə ibadətini yerinə yetirmək üçün bir tur şirkəti ilə əlaqə saxlayıb və hər biri orta hesabla 1500 ABŞ dolları ödəyib. Lakin ödənişdən sonra şirkət nümayəndəsi ilə əlaqənin kəsildiyi bildirilir. Vətəndaşlar qeyd ediblər ki, onların uçuşu 3 aprel tarixində planlaşdırılıb, lakin səfər baş tutmayıb.

Zərərçəkənlər məsələ ilə bağlı Akyazıdakı polis bölməsinə gedərək şikayət ərizəsi təqdim ediblər.

İddialara görə, İstanbul mərkəzli Həcc və Kəbə xidməti göstərən turizm şirkətinin təkcə Sakaryada deyil, həm də Kocaeli və Düzce bölgələrindəki vətəndaşları da aldadaraq eyni üsulla vəsait topladığı ehtimal olunur.

Şirkətin Sakarya filialı isə məsələ ilə bağlı açıqlama yayaraq özlərinin də zərərçəkən olduqlarını bildirib. Açıqlamada qeyd olunub ki, təşkilati və maliyyə məsələləri mərkəzi ofis tərəfindən idarə edildiyindən yaranmış problemlərə birbaşa müdaxilə etmək imkanları yoxdur. Filial həmçinin zərərçəkən vətəndaşlara hüquqi yollara müraciət etməyi tövsiyə edib və özlərinin də hüquqi prosesə başladığını vurğulayıb.

Telegramda izləyin