Evinizi su basanda bu səhvi etməyin - HƏYATİ TƏHLÜKƏ YARADIR

Evi su basması hər bir ev sahibi üçün həm maddi, həm də mənəvi baxımdan olduqca stresli vəziyyətdir. Belə halla qarşılaşdıqda panikaya düşmədən, soyuqqanlı şəkildə hərəkət etmək həm təhlükəsizliyi təmin edir, həm də dəyən ziyanın miqdarını azaldır.

İlk növbədə, mütləq şəkildə yadda saxlamaq lazımdır ki, su və elektrik enerjisinin təması həyati təhlükə yaradır. Buna görə də, suya daxil olmazdan əvvəl mənzilin və ya evin əsas elektrik açarını (şitini) söndürmək lazımdır. Əgər elektrik paneli suyun içindədirsə və ya ona çatmaq risklidirsə, heç bir halda müdaxilə etməməli və dərhal mütəxəssis çağırmalısınız.

Eyni zamanda, qaz sızması riskinə qarşı qaz klapanını da bağlamaq tövsiyə olunur.

"Yeni Sabah" xəbər verir ki, təhlükəsizlik tədbirləri görüldükdən sonra suyun mənbəyini müəyyən etmək və qarşısını almaq lazımdır. Əgər su sızması mənzil daxilindəki borulardan qaynaqlanırsa, mərkəzi su kranını bağlayaraq axını dayandırmaq mümkündür. Lakin problem qonşulardan və ya binanın ümumi xəttindən qaynaqlanırsa, dərhal aidiyyəti şəxslərə və ya bina idarəçiliyinə məlumat verilməlidir. Suyun axını dayandırıldıqdan sonra növbəti vacib addım zərərin sənədləşdirilməsidir. Sığorta şirkətinə müraciət etmək və ya gələcəkdə yarana biləcək hüquqi məsələləri həll etmək üçün su basmış ərazilərin, zərər görmüş əşyaların və suyun səviyyəsinin fotoşəkillərini və videolarını çəkmək vacibdir. Bu, dəyən ziyanın kompensasiya edilməsi prosesində ən mühüm sübut hesab olunur.

Təmizlik mərhələsinə keçdikdə isə operativlik əsas şərtdir. Suyun məkanda uzun müddət qalması divarların strukturuna zərər verir və qısa müddətdə kif (göbələk) yaranmasına səbəb olur. İmkan daxilində nasoslar, vedrələr və ya tozsoranlar vasitəsilə su xaric edilməlidir. Sudan zərər görmüş xalçalar, mebellər və digər əşyalar dərhal qurudulmalı, yaş qalmış tekstil məhsulları isə evdən çıxarılmalıdır. Otaqların havasını dəyişmək, pəncərələri açmaq və ya nəmişlikçəkən cihazlardan istifadə etmək qurutma prosesini sürətləndirir. Unutmayın ki, su basmasından sonra divarların və döşəmənin tam quruması bir neçə gün, bəzən isə həftələr çəkə bilər, ona görə də təmir işlərinə başlamazdan əvvəl mütləq tam quruluğa əmin olmaq lazımdır.

Telegramda izləyin