15 avtomobil eyni anda yanıb kül oldu: Tək bir şübhə var!

İstanbulun Beşiktaş rayonunda yerləşən maşın qaleryasında baş verən yanğın 15 avtomobilə sıçrayaraq böyük maddi ziyana səbəb olub.

Sonxeber.az türk mediasına istinadən xəbər verir ki, hadisə gecə saat 04:30 radələrində Balmumcu məhəlləsində, Barbaros Bulvarı üzərində yerləşən 4 mərtəbəli binanın girişində fəaliyyət göstərən avtomobil qalereyasında qeydə alınıb. Məlumata görə, əvvəlcə park halında olan avtomobillərdən birində yanğın başlayıb. Qısa müddətdə alov yaxınlıqda olan digər 14 avtomobilə də keçərək genişlənib.

Hadisə yerinə çox sayda yanğınsöndürən, təcili tibbi yardım və polis əməkdaşları cəlb olunub. Polis ərazidə təhlükəsizlik tədbirləri görərək yolu nəqliyyat üçün bağlayıb, yanğınsöndürənlər isə alovun qarşısını almağa çalışıblar.

Təxminən bir saat davam edən müdaxilədən sonra yanğın nəzarət altına alınıb, daha sonra isə tam söndürülüb. Hadisə nəticəsində 15 avtomobil ciddi zərər görüb, həmçinin binanın fasadında da qismən yanıq izləri qeydə alınıb.

Əraziyə cəlb olunan hadisə yeri araşdırma qrupları yanğının baş vermə səbəbini müəyyənləşdirmək üçün iş aparır. İlkin ehtimallara görə, yanğının qəsdən törədildiyi istisna edilmir.

Rəsmi qurumlar faktla bağlı araşdırmaların davam etdiyini bildirir.

Telegramda izləyin