Aylar əvvəl meyiti tapılan qadının ölüm səbəbi hələ də bəlli deyil

İspaniyaya bağlı Gran Canaria adasında aylar əvvəl yarıçılpaq vəziyyətdə tapılan qadın meyitinin kimliyi müəyyən edilib.

Sonxeber.az xarici mediaya istinadən xəbər verir ki, aparılan araşdırmalar nəticəsində meyitin 32 yaşlı macar reality-şou ulduzu və sosial media fenomeni Annabella Lovas-a aid olduğu diş qeydləri əsasında təsdiqlənib. Polis kimliyi dəqiqləşdirmək üçün qadının bir dişini Interpol-a göndərərək rəsmi təsdiq alıb.

Məlumata görə, qadının meyiti Berriel Ravine bölgəsində yerləşən təbii su hövzəsində aşkarlanıb. Səlahiyyətlilər bildiriblər ki, meyit təxminən üç həftə suda qaldığından DNT analizi ciddi zədələnib, barmaq izləri və şəxsi əşyalar isə tapılmayıb.

Hadisə ilə bağlı araşdırma aparan polis orqanları qətl ehtimalını istisna edib. Ölüm səbəbi isə meyitin uzun müddət suda qalması səbəbindən dəqiq müəyyənləşdirilə bilməyib.

Qeyd olunub ki, Annabella Lovas üçün 2024-cü ildə itkin düşmə ilə bağlı müraciət edilib. O, qısa müddət sonra Playa del Inglés bölgəsində sağ tapılsa da, ailəsi sonradan yenidən itkin düşməsi barədə məlumat verib.

Polis bildirib ki, meyitin çətin əlçatan ərazidə tapılması araşdırmaları ləngidib. Yerli mənbələr isə qadının ölümündən sonra güclü yağışların təsiri ilə meyitin tapıldığı əraziyə sürüklənmiş ola biləcəyini ehtimal edir.

Telegramda izləyin