Polis yolda hakimlə mübahisə etməyin cəzasını ağır ödədi

Türkiyənin Elazığ şəhərində polis ilə hakim arasında baş verən yol mübahisəsi inzibati araşdırmaya səbəb olub.

Sonxeber.az türk mediasına istinadən xəbər verir ki, hadisə çərşənbə günü şəhər mərkəzində qeydə alınıb. İddialara əsasən, qadın hakimin idarə etdiyi avtomobil yolda sıxlığa səbəb olub. Bu zaman xidmətdə olduğu bildirilən polis əvvəlcə megafon vasitəsilə sürücüyə xəbərdarlıq edib. Daha sonra xidməti avtomobillə sürücüyə yaxınlaşan polisin avtomobil idarə edərkən siqaret çəkdiyini əsas gətirərək onu xəbərdar etdiyi irəli sürülür.

Bildirilir ki, sürücü siqareti yerə atdıqdan sonra polis ətraf mühiti çirkləndirdiyi üçün ikinci dəfə xəbərdarlıq edib. Bu zaman sürücünün "Mən hakiməm" deyərək etiraz etdiyi, polsin isə ondan şəxsiyyət vəsiqəsi tələb etdiyi qeyd olunur. Sürücünün sənədinin yanında olmadığını bildirdiyi və telefonla bir prokurorla əlaqə saxlayaraq kimliyini təsdiqlətdiyi iddia edilir. Danışıqdan sonra tərəflər arasında qısa mübahisə yaşanıb.

Hadisədən iki gün sonra qadın hakimin polis barəsində şikayət etdiyi və məsələnin Elazığ Valiliği tərəfindən araşdırılmağa başlandığı bildirilib. Aparılan inzibati yoxlama çərçivəsində polisin vəzifəsindən müvəqqəti uzaqlaşdırıldığı qeyd olunub.

Telegramda izləyin