Keçmiş həyat yoldaşının yeni sevgilisini ölümcül döydü - VİDEO

Türkiyənin Nevşehir şəhərində baş verən zorakılıq hadisəsi təhlükəsizlik kameralarına düşüb.

Sonxeber.az türk mediasına istinadən xəbər verir ki, qısa müddət əvvəl həbsdən çıxan şəxs keçmiş həyat yoldaşının sevgilisinə hücum edib.

Hadisə şəhərin 2000 Evler məhəlləsində, Mustafa Paslanmaz küçəsində yerləşən yaşayış binasında qeydə alınıb. İddialara görə, B.C. adlı şəxs ayrıldığı keçmiş həyat yoldaşı D.C.-nin imam nikahı ilə birlikdə yaşadığı A.B.-nin ünvanına gələrək onunla mübahisə etməyə başlayıb.

Qısa müddətdə böyüyən mübahisə zamanı B.C. əvvəlcə A.B.-yə yumruqla, daha sonra isə parke daşı ilə hücum edərək baş nahiyəsindən ağır yaralayıb. Hadisə ilə bağlı daxil olan məlumat əsasında əraziyə təcili tibbi yardım və polis əməkdaşları cəlb olunub. İlkin tibbi yardım hadisə yerində göstərildikdən sonra yaralı xəstəxanaya yerləşdirilib.

Hadisədən sonra qaçan şübhəlinin saxlanılması istiqamətində əməliyyat tədbirləri həyata keçirilib. Barəsində uzaqlaşdırma qərarı olduğu bildirilən B.C. aparılan axtarışlar nəticəsində Yozqat vilayətində saxlanılaraq Nevşehir Polis İdarəsinə təhvil verilib.

Polisdə aparılan istintaq tədbirlərindən sonra məhkəməyə çıxarılan B.C. "qəsdən adam öldürməyə cəhd" maddəsi ilə həbs olunub.

Qeyd edək ki, hücum anı yaşayış binasının təhlükəsizlik kameraları tərəfindən saniyə-saniyə qeydə alınıb.

Faktla bağlı araşdırma davam etdirilir.

Telegramda izləyin