İki uşağının anasını boğazından vuraraq öldürdü - VİDEO

Türkiyənin İzmir şəhərinin Buca rayonunda baş verən silahlı insident faciə ilə nəticələnib.

Sonxeber.az türk mediasına istinadən xəbər verir ki, həyat yoldaşı ilə mübahisə edən 39 yaşlı, iki uşaq anası qadın atəş açılması nəticəsində həyatını itirib.

Hadisə saat 21:30 radələrində Çamlıpınar məhəlləsində yerləşən üçmərtəbəli binanın giriş mərtəbəsində baş verib. Bildirilir ki, Nurcan Çubuk ilə həyat yoldaşı Ç.Ç. arasında hələlik səbəbi məlum olmayan mübahisə yaranıb və bu mübahisə qısa müddətdə davaya çevrilib. Bu zaman kişi tapançadan atəş açaraq həyat yoldaşını boyun nahiyəsindən vurub.

Hadisə barədə məlumat verən qonşuların çağırışı ilə əraziyə polis və təcili tibbi yardım briqadaları cəlb olunub. Həkimlərin apardığı ilkin müayinədə qadının hadisə yerində həyatını itirdiyi müəyyən edilib.

Hadisə yerində aparılan araşdırmalardan sonra qadının meyiti məhkəmə-tibbi ekspertiza üçün morqa aparılıb. Cinayəti törətdikdən sonra hadisə yerindən qaçan şübhəli qısa müddət ərzində Karabağlar rayonunda polis tərəfindən saxlanılaraq istintaqa cəlb olunub. Faktla bağlı araşdırma davam etdirilir.

Telegramda izləyin