İçkili halda sükan arxasına keçən gəncin sürücülük vəsiqəsi ömürlük ləğv edildi - VİDEO

Aksaray şəhərində spirtli içki qəbul etdikdən sonra sükan arxasına keçən 18 yaşlı sürücü qəza törədib.

Sonxeber.az xarici mediaya istinadla xəbər verir ki, hadisə Böyük Bölcek məhəlləsində, Şəhid Mehmet Ali Demir küçəsində baş verib. Məlumata görə, Batuhan A. adlı 18 yaşlı gənc spirtli içki qəbul etdikdən sonra 68 DN 307 nömrəli avtomobillə yola çıxıb. Bir müddət sonra sükan idarəetməsini itirən sürücünün avtomobili yol kənarına çıxaraq yaşayış binasının hasarına çırpılıb və dayanıb.

Ətrafdakı sakinlərin məlumat verməsindən sonra hadisə yerinə polis əməkdaşları cəlb olunub. Aparılan yoxlama zamanı sürücünün xəsarət almadığı məlum olub. Polis tərəfindən keçirilən alkoqol testində isə onun 2.02 promil sərxoş olduğu müəyyənləşdirilib.

Alkoqol səviyyəsinin qanuni həddən təxminən 4 dəfə çox olması səbəbindən gənc sürücüyə 25 min lirə məbləğində inzibati cərimə tətbiq olunub. Namizəd sürücü olduğu üçün onun sürücülük vəsiqəsi də daimi olaraq ləğv edilib.

Qəzadan sonra avtomobil cərimə meydançasına aparılıb. Gənc sürücü barəsində araşdırma başladıldığı və ifadəsinin alınması üçün polis bölməsinə aparıldığı bildirilib.

Telegramda izləyin