Niyə eyni səhvləri təkrarlayırıq? - AÇIQLAMA

İnsan davranışı çox vaxt sadə seçimlərdən yox, vərdişlərdən, emosiyalardan və keçmiş təcrübələrdən formalaşır.

Ona görə də "eyni səhvi təkrarlamaq" kənardan asan görünsə də, psixoloji baxımdan daha dərin səbəblərə dayanır. Bu mövzuda psixoloqların izahı xüsusilə diqqət çəkir.

Bəs görəsən niyə eyni səhvləri təkrarlayırıq?

Psixoloq Gülsər Qədirli bu barədə Sonxeber.az -a açıqlama verib:

"İnsanın eyni səhvləri təkrar etməsinin bir neçə əsas səbəbi var. Ən yayılmış səbəblərdən biri öyrəşilmiş davranış modelidir. Beyin tanış olanı təhlükəsiz qəbul edir, hətta bu davranış nəticə etibarilə zərərli olsa belə. İnsan dəyişmək istəsə də, beynin avtomatik reaksiyaları onu yenidən köhnə seçimlərə qaytara bilər.

Digər mühüm faktor emosional bağlılıqdır. Bəzi insanlar üçün səhv seçimlər belə müəyyən bir rahatlıq və ya tanışlıq hissi yaradır. Xüsusilə uşaqlıqdan gələn davranış nümunələri böyüklük dövründə də təkrarlana bilir.

İnsan çox vaxt etdiyi səhvi tam analiz etmədən irəliləyir. Yəni səbəbini anlamadan davam etdiyi üçün eyni vəziyyət yenidən ortaya çıxır. Özünü günahlandırmaq və ya problemi inkar etmək də bu dövrü gücləndirir.

Bu dövrü qırmağın ən vacib yolu öz davranışlarını müşahidə etmək, səhvin kök səbəbini anlamaq və lazım olduqda peşəkar dəstək almaqdır. Beləliklə, insan eyni ssenarini təkrar etmək əvəzinə daha sağlam seçimlər edə bilər".

Telegramda izləyin