Oğlunu güllələyərək öldürən keçmiş polis ifadə verdi: "Bir anlıq əsəbləşdim" - VİDEO

Türkiyənin Adana şəhərində narkotik asılılığı olan oğlunu silahla vuraraq öldürən keçmiş polis əməkdaşı Faruk Kayhanın istintaqa verdiyi ifadə ortaya çıxıb.

Sonxeber.az türk mediasına istinadən xəbər verir ki, hadisənin ailədaxili mübahisə zəminində baş verdiyi bildirilir. İfadəsində oğlunun uzun müddətdir narkotik asılılığından əziyyət çəkdiyini deyən Kayhan, onu bu vəziyyətdən xilas edə bilmədiyini bildirib.

Keçmiş polis əməkdaşı oğlunun qumar borclarının da olduğunu qeyd edərək, hadisə günü ondan pul istədiyini, pul verməkdən imtina etdikdən sonra aralarında mübahisə yarandığını söyləyib.

"Onu narkotik bataqlığından xilas edə bilmədim. Qumar borcu da var idi. Məndən pul istədi, vermədiyim üçün mübahisə etdik. Bir anlıq əsəbiləşdim, özümü itirdim. Etdiyimə görə çox peşmanam", - deyə Kayhan ifadəsində bildirib.

Hadisə ilə bağlı araşdırmalar davam etdirilir.

Telegramda izləyin