4 uşaq anası zirzəmidə ölü tapıldı: Ölüm səbəbi araşdırılır

Türkiyənin Hakkari vilayətində şübhəli ölüm hadisəsi qeydə alınıb. Bağlar məhəlləsində yerləşən yaşayış binasının zirzəmisində 4 uşaq anası H.Ç. hərəkətsiz vəziyyətdə aşkarlanıb.

Sonxeber.az xarici mediaya istinadla xəbər verir ki, hadisəni görən şəxslərin məlumat verməsindən sonra əraziyə polis və təcili tibbi yardım briqadaları cəlb olunub. Həkimlərin apardığı ilkin müayinə zamanı qadının həyatını itirdiyi müəyyən edilib.

Hadisə yerində aparılan ilkin araşdırmalar zamanı H.Ç.-nin baş nahiyəsinə aldığı zərbələr nəticəsində vəfat etmiş ola biləcəyi ehtimalı irəli sürülüb. Polis əməkdaşları ərazidə geniş araşdırma apararaq ölümün dəqiq səbəbinin müəyyənləşdirilməsi istiqamətində işlərə başlayıblar.

Qadının meyiti məhkəmə-tibbi ekspertiza və yarılma prosedurları üçün morqa aparılıb.

Hüquq-mühafizə orqanları hadisənin qətl olub-olmaması da daxil olmaqla bütün ehtimalları nəzərdən keçirir. Faktla bağlı genişmiqyaslı istintaq davam etdirilir.

Telegramda izləyin