Məşhur müğənni səhnədə SMA xəstəsi körpənin anasının sözünü kəsdi: "Mən bir az mahnı oxuyum" - VİDEO

Türkiyənin Bursa vilayətinin Mustafakemalpaşa rayonunda keçirilən Yörük-Türkmən Festivalında baş verən hadisə sosial şəbəkələrdə geniş müzakirələrə səbəb olub. Tanınmış müğənni Gökhan Güney, SMA xəstəsi körpəsi üçün yardım istəyən ananın çıxışını yarımçıq kəsərək səhnədə söylədiyi sözlərlə tənqid hədəfinə çevrilib.

Sonxeber.az xarici mediaya istinadla xəbər verir ki, festival zamanı kənd sakinlərindən olan və SMA xəstəsi övladının müalicəsi üçün zamanla yarışan ana səhnəyə çıxaraq iştirakçılardan dəstək istəyib. Göz yaşları içində körpəsinin vəziyyətindən danışan və yardım kampaniyasına dəstək çağırışı edən ananın çıxışı gözlənilmədən müğənni Gökhan Güney tərəfindən dayandırılıb.

Mikrofona yaxınlaşan müğənni təşkilatçıları və kənd muxtarlarını göstərərək anaya belə müraciət edib:

"Burada 19 muxtar var, bunu onlara deyəcəksən, bu işi onlar təşkil edər. Mən bir az mahnı oxuyum, bağışla"

Bu sözlərdən sonra ana səhnəni tərk etmək məcburiyyətində qalıb. Hadisənin görüntüləri qısa müddətdə sosial şəbəkələrdə yayılaraq böyük narazılıq doğurub.
Hadisənin şahidlərindən biri görüntüləri paylaşaraq bunları yazıb:

"Kəndimizin şənliyinə gəlib, xəstə körpəmizi və göz yaşları içində kömək istəyən ananı bu şəkildə kənara çəkə bilməzsiniz"

Sosial şəbəkə istifadəçiləri müğənninin davranışını həssaslıqdan uzaq addım kimi qiymətləndirərək onu sərt tənqid ediblər.

Telegramda izləyin