30 il yediyi göbələk bu dəfə onu zəhərlədi: Reanimasiyaya yerləşdirildi - VİDEO

Türkiyənin Ərzurum vilayətində 30 ildən artıqdır təbiətdən topladığı göbələkləri istehlak edən 50 yaşlı Ekrem Aydəmir bu dəfə ağır zəhərlənərək reanimasiya şöbəsinə yerləşdirilib.

Sonxeber.az xarici mediaya istinadla xəbər verir ki, üç uşaq atası olan və bazarda çalışan Ekrem Aydəmir təxminən bir həftə əvvəl dostları ilə birlikdə kənd ərazisində göbələk yığmağa gedib. O, hər zaman topladığı ərazidən yığdığı göbələkləri evə apararaq qardaşları ilə birlikdə yeyib.

Göbələyi yedikdən sonra gecə heç bir narahatlıq hiss etməyən Aydəmirin vəziyyəti səhərə yaxın pisləşib. Onda şiddətli qarın ağrısı, ürəkbulanma, qusma və ishal başlayıb. Bundan sonra o, Atatürk Universiteti Araşdırma Xəstəxanasının Təcili Yardım şöbəsinə müraciət edib.

Aparılan müayinələr nəticəsində Ekrem Aydəmirin göbələkdən zəhərləndiyi müəyyən olunub və o, xəstəxananın reanimasiya şöbəsində müalicəyə götürülüb. Həkimlər onun qaraciyər göstəricilərində də problemlərin yarandığını bildiriblər.

Hadisədən danışan Aydəmir qardaşları və ailəsinin eyni göbələyi yeməsinə baxmayaraq, onlarda heç bir narahatlıq yaranmadığını bildirib.

"30 ildir mütəmadi olaraq göbələk toplayıb yeyirdim, indiyədək heç vaxt zəhərlənməmişdim. Həkimlərdən öyrəndim ki, təbiətdə zəhərsiz hesab edilən göbələklər də təhlükəli ola bilər. Bundan sonra hər kəsə deyəcəyəm ki, yabanı göbələk yeməsin. Yaşadıqlarımdan sonra buna görə çox peşmanam", - deyə o bildirib.

Mütəxəssislər isə vətəndaşlara mənşəyi məlum olmayan və təbiətdən toplanan yabanı göbələkləri istehlak etməməyi tövsiyə edir.

Telegramda izləyin