Elə bir paylaşım etdi ki, 89 polis gecə boyu onu axtardı - VİDEO

Türkiyənin Şırnak şəhərində sosial şəbəkədə vida xarakterli video paylaşdıqdan sonra itkin düşən 14 yaşlı B.B.B. polis əməkdaşlarının gecə boyu apardığı axtarış nəticəsində sağ-salamat tapılıb.

Sonxeber.az xarici mediaya istinadla xəbər verir ki, yeniyetmə itkin düşməzdən əvvəl "Snapchat" hesabında "Bildiyiniz kimi, artıq mən olmayacağam. Bir neçə saat sonra birdəfəlik yoxam. Bu, atacağım son snap olacaq" məzmunlu video paylaşıb. Ailəsinin müraciətindən sonra Şırnak polisi dərhal axtarışlara başlayıb.

Polisin apardığı əməliyyata Şırnak İl Emniyyət Müdiri Volkan Sazakonun rəhbərlik etdiyi, ümumilikdə 20 qrup və 89 əməkdaşın iştirak etdiyi bildirilib. Köhnə binalar, parklar, boş ərazilər və şübhəli məkanlar yoxlanılıb.

Uzunmüddətli axtarışlardan sonra B.B.B. səhər saat 06:00 radələrində Gündoğdu məhəlləsindəki boş tikililərdən birində tapılıb.

İlkin müayinələr zamanı yeniyetmənin səhhətinin yaxşı olduğu və hər hansı xəsarət almadığı müəyyən edilib. Polis əməkdaşları onu ailəsinə təhvil verib.

Şırnak polisi itkin şəxslərlə bağlı müraciətlərdə bütün imkanların səfərbər edildiyini və belə hallarda vaxt itirmədən 112 təcili yardım xəttinə və aidiyyəti qurumlara məlumat verilməsinin vacibliyini vurğulayıb.

Telegramda izləyin