Qadınların immun sistemi COVID-19-dan sonra daha sürətlə normala dönür - Elmi araşdırma

Koronavirus infeksiyasından sonra immun sisteminin bərpası pasiyentin cinsindən birbaşa asılıdır. Qadınlarda bu proses yaş qrupundan asılı olmayaraq, kişilərə nisbətən daha sürətlə gedir.

Oxu.Az Gazeta.ru-ya istinadən xəbər verir ki, bu qənaətə rusiyalı alimlərin apardıqları tədqiqat nəticəsində gəlinib.

Yoluxucu xəstəliklər zamanı həkimlər adətən antikorların səviyyəsinə və limfositlərin ümumi sayına diqqət yetirirlər. Lakin bu göstəricilər immun reaksiyasının yalnız antikor istehsalı ilə bağlı olan hissəsini əks etdirir. Patogenlə təmas anında dərhal aktivləşən anadangəlmə immunitet isə standart analizlərdən kənarda qalır. Onun əsas elementi olan faqositlər antikorlar yaranmamışdan əvvəl virusu məhv etmək gücünə malikdir.

Tədqiqatçılar COVID-19 keçirmiş 19-50 yaş arası pasiyentlərin 206 immunoqramını təhlil ediblər. Bu yaş aralığının seçilməsi təsadüfi deyil: məhz bu dövrdə xəstələnmənin pik həddi müşahidə olunur, 50 yaşdan sonra isə orqanizmdəki yaşla bağlı dəyişikliklər göstəriciləri təhrif edə bilər. Mütəxəssislər xəstəliyin kəskin mərhələsi və sağalma dövrü üçün faqositlərin mütləq sayı, faqositar ədəd (bir hüceyrənin məhv etdiyi patogenlərin sayı) və faqositar indeks (sistemin ümumi aktivliyi) kimi üç parametri qiymətləndiriblər.

Tədqiqatda iştirak edən alimlərdən biri bildirib: "Tədqiqat zamanı müxtəlif pasiyent qruplarında faqositlərin fəaliyyətinin necə dəyişdiyini müəyyən etdik. Koronavirus infeksiyasından sonra immunitetin bərpası cinslə birbaşa əlaqəlidir. Qadınlarda bu proses kişilərlə müqayisədə daha sürətli gedir və bu qanunauyğunluq bütün yaş qruplarında özünü göstərir".

Ehtimal olunur ki, bu vəziyyət hormonal fərqliliklərdən irəli gəlir. Belə ki, estrogenlər stimullaşdırıcı təsir göstərərək hüceyrələrin bərpasını sürətləndirir, kişilərdəki yüksək testosteron səviyyəsi isə immun reaksiyasını zəiflədə bilər.

Tədqiqat müəllifləri həmçinin müəyyən ediblər ki, immun hüceyrələrinin fəaliyyətində ən böyük disbalans 31-40 yaş arası qadınlarda və 41-50 yaş arası kişilərdə müşahidə edilir. Məhz bu qruplar ağırlaşmalar üçün yüksək risk zonasında yer alırlar. Orta hesabla faqositlərin fəallığının normadan kənara çıxması təqribən 20 faiz təşkil edir.

Telegramda izləyin