"Güclü dövlətin əsasını xalq-iqtidar birliyi təşkil edir" - DEPUTAT

1990-cı illərin əvvəllərində SSRİ-nin dağılması, planlı iqtisadiyyatın iflası və Qarabağ müharibəsi Azərbaycanı dərin iqtisadi-siyasi böhrana sürüklədi. Siyasi qeyri-sabitlik və hərbi məğlubiyyətlər isə dövlət müstəqilliyini yox olmaq təhlükəsi ilə üz-üzə qoydu. Həmin dövrdə Azərbaycan mürəkkəb siyasi və iqtisadi vəziyyətlə üz-üzə qalmışdı. Daxili sabitliyin pozulması, iqtisadi tənəzzül və dövlət idarəçiliyində yaranan problemlər ölkənin gələcəyini şübhə altına almışdı. Ölkə daxilində müxtəlif silahlı qruplaşmaların hakimiyyət və səlahiyyət savaşına çıxması ölkədə siyasi böhrana səbəb olmuşdu. Mövcud ictimai-siyasi xaos daha da dərinləşərək anarxiya həddinə çatmışdı.

Ulu öndər Heydər Əliyevin 1987-ci ildə SSRİ rəhbərliyindən uzaqlaşdırılması erməni millətçilərinin Azərbaycan torpaqlarına iddiası qarşısında böyük imkanlar açdı. Azərbaycan xalqının maraqlarını təmin etməkdənsə, Moskvanın maraqlarını yerinə yetirməyə çalışan siyasətçilərin hakimiyyətə gəlməsi Qarabağda vəziyyəti daha da ağırlaşdırdı. Müstəqillik ərəfəsində Azərbaycan artıq bir çox faciələrdən keçmişdi".

AXC-"Müsavat" dövründə ölkəni "idarə edən" siyasi komanda səriştəsiz, təcrübəsiz və savadsız şəxslərdən ibarət antimilli dəstə idi. Həm iqtidar, həm müxalifətdə olan AXC-Müsavat cütlüyü Azərbaycan Silahlı Qüvvələrini yaratmaq, ölkənin müdafiəsini təşkil etmək, xalqın birliyini təmin etmək əvəzinə hakimiyyət uğrunda mübarizəyə başladılar. Yaranan hərbi dəstələr də ancaq hakimiyyət uğrunda mübarizədə bir vasitə kimi istifadə edilirdi

Müdafiəsiz qalan rayonlarımız bir-birinin ardınca ermənilər tərəfindən işğal edilirdi. Torpaqlarımızın uzun illər işğal altında saxlanılmasında və vətəndaşlarımızın vəhşicəsinə qətlə yetirilməsində da o dövrdə hakimiyyətdə olan siyasi qüvvələrin də böyük məsuliyyəti daşıyırlar.

1993-cü ildə respublikada artıq həyatın bütün sahələrini böhran bürümüşdü. AXC-"Müsavat" cütlüyünün yarıtmaz fəaliyyəti nəticəsində ölkədə tam bir xaos və anarxiya yaranmış, daxili çəkişmələr özünün pik nöqtəsinə çatmışdı. Artıq əlinə silah alan hər kəs hakimiyyəti ələ keçirməyə çalışırdı və separatist meyillər kəskin xarakter almışdı.

Ulu öndər Heydər Əliyevin hakimiyyətə gəlməsi ilə Azərbaycanın ağır uçuruma düşməsinin qarşısı alındı. Xalqın tələbi ilə hakimiyyətə qayıdan Heydər Əliyev ölkədə ictimai-siyasi sabitliyin təmin edilməsinə nail oldu. Onun rəhbərliyi altında dövlət institutları gücləndirildi, qanunçuluq bərpa edildi və milli həmrəylik möhkəmləndirildi.

Hakimiyyətə gəldiyi gündən Heydər Əliyevin həyata keçirdiyi uzaqgörən siyasət Azərbaycanın beynəlxalq mövqeyinin güclənməsinə də şərait yaratdı. Bütün sahələrin inkişafı ilə bağlı əsaslı tədbirlər görüldü, xarici dövlətlərlə əməkdaşlıq əlaqələri genişləndirildi, ölkəyə xarici investisiyalar cəlb olundu və iqtisadi inkişaf üçün əlverişli şərait yaradıldı. Xüsusilə enerji sahəsində. Enerji strategiyasının uğurla həyata keçirilməsi Azərbaycanın iqtisadi müstəqilliyini möhkəmləndirdi və gələcək inkişafın əsasını qoydu.

Ulu öndər Heydər Əliyev müəyyən etdiyi inkişaf strategiyası, dövlətçilik ideyaları və milli maraqlara əsaslanan siyasi kurs bu gün də Azərbaycanın güclənməsinə, müstəqilliyinin qorunmasına və tərəqqisinə xidmət edir.

Bu gün ulu öndər Heydər Əliyevin başladığı siyasəti uğurla davam etdirən cənab prezident İlham Əliyev Ərazi bütövlüyümüzü və suverenliyimizi tam bərpa edərək adını güclü sərkərdə kimi Azərbaycan tarixinə qızıl hərflərlə həkk etdirdi.

1990-ci illərin əvvəllərində hakimiyyətdə olan və ölkəmizi parçalamağa çalışan qüvvələr bu gün Azərbaycan dövlətin əldə etdiyi tarixi qələbələri, xüsusilə də 44 günlük Vətən müharibəsindəki zəfəri və regiondakı liderlik mövqeyini qəbul etmir. Onlar daxili inkişafa kölgə salmaq məqsədilə xarici dairələrin anti-Azərbaycan kampaniyalarına dəstək verirlər. Hətta bəziləri dövlət maraqlarına zidd olan qarayaxma kampaniyaları aparmaqdan belə çəkinmirlər.

Şəxsi maraqlarını milli mənafedən üstün tutan, ayrı-ayrı qərb ölkələrində mühacir adı ilə məskunlaşan antimilli ünsürlər sosial şəbəkələrdəki çıxışları ilə özlərini davamlı şəkildə ifşa etməkdədirlər.

Azərbaycana qarşı çirkin niyyətlərini gerçəkləşdirməyə cəhd edən qüvvələr cızdıqları ssenarinin icrasında onlardan ustalıqla istifadə edirlər. Onların sosial şəbəkələrdə dövlətçiliyimizin əleyhinə səsləndirdikləri cəfəngiyyatlar xaricdəki himayədarları, erməni lobbisi ilə şəxsi maraqlar üzərində qurulmuş işbirliyini bir daha ortaya qoyur. Onlar ölkənin inkişafını, xalq-iqtidar birliyini və uğurlu xarici siyasət kursunu həzm edə bilmir, ictimaiyyətdə çaşqınlıq yaratmağa cəhd edirlər.

Anti-milli qüvvələrin və ya satqın ünsürlər Azərbaycanın əldə etdiyi tarixi və siyasi nailiyyətlərə qarşı qarayaxma kampaniyaları apararaq ölkəmizin uğurlarına kölgə salmağa çalışırlar. Onların əsas məqsədi ölkənin beynəlxalq nüfuzuna xələl gətirmək, daxili sabitliyi pozmaq və dezinformasiya yaymaqdır. Amma artıq onların qurduqları her bir ssenari məğlubiyyətə məhkumdur. Xalqımız artıq sözlərə deyil, əmələ inanırlar. Xalqımız yaxşı bilir ki, antimilli qüvvələrin tək məqsədi 90-cı illərin əvvəllərində olduğu sabitliyi pozmaq və ölkədaxili münaqişələri yenidən başlamaqdadır. Lakin unudurlar ki, bu gün mövcud olan xalq-iqtidar birliyi ölkəmiz dinamik inkişaf edir, işğaldan azad olunmuş torpaqlarımızda sürətli və geniş miqyaslı quruculuq işləri aparılır. Ən önəmlisi güclü dövlətin əsasını xalq-iqtidar birliyi təşkil edir. Xalqımız əmindir ki, dövlətimiz Prezident İlham Əliyevin rəhbərliyi ilə daha uca zirvələr fəth ediləcək, Qarabağ dünyanın ən gözəl guşələrindən birinə çevriləcək.

Cavanşir Paşazadə
Milli Məclisin deputatı

Telegramda izləyin