Günəş şüasının orqanizmə faydası

Gün işığı orqanizmin normal fəaliyyətinin qorunmasında mühüm rol oynayır. O, bioloji saatın tənzimlənməsindən D vitamini sintezinə, immun sisteminin gücləndirilməsindən əhval-ruhiyyə və yuxu keyfiyyətinin yaxşılaşmasına qədər bir çox prosesə müsbət təsir göstərir.

Axşam.az xəbər verir ki, günəş şüaları orqanizmin "sirkadiyal ritm" adlanan bioloji saatını tənzimləyir. Bu da gündüz saatlarında daha enerjili olmağa, gecə isə rahat yuxuya getməyə kömək edir.

Mütəxəssislər bildirib ki, günəş şüaları dəri vasitəsilə D vitamininin sintezini təmin edir. D vitamini sümüklərin möhkəm qalmasına, əzələlərin normal fəaliyyətinə və immun sisteminin düzgün işləməsinə dəstək verir.

Gün işığı əhval-ruhiyyəni yaxşılaşdıran hormonların ifrazını artırır. Bu isə stressin azalmasına, psixoloji vəziyyətin yaxşılaşmasına və ümumi həyat keyfiyyətinin yüksəlməsinə kömək edir.

Kifayət qədər günəş işığı qəbul etmək tənəffüs yolu infeksiyalarına qarşı müqaviməti artıra, iltihabi proseslərin tənzimlənməsinə və immun sisteminin güclənməsinə müsbət təsir göstərə bilər.

Günəşdən faydalanarkən təhlükəsizlik qaydalarına riayət etməyi, xüsusilə yay aylarında günün ən isti saatlarında uzun müddət birbaşa günəş altında qalmamağı unutmayın.

Telegramda izləyin