Donald Trampın Prezident İlham Əliyevin Şuşa Forumundakı çıxışı ilə bağlı etdiyi paylaşım dünyaya verilən dostluq mesajıdır

"ABŞ Prezidenti Donald Tramp Azərbaycan Prezidenti İlham Əliyevin IV Şuşa Qlobal Media Forumundakı çıxışına dair məqaləni özünün "Truth Social" hesabında paylaşması onun iki ölkə arasında dostluq münasibətlərini önəmsədiyini sübut edir".

Bunu Sonxeber.az-a danışan deputat Nəsib Məhəməliyev bildirib.

Deputat qeyd edib ki,"Breitbart News"un müxbiri Coşua Kleyn tərəfindən hazırlanan məqalə İlham Əliyevin forum çərçivəsində nəşrin suallarını cavablandırarkən səsləndirdiyi fikirləri əhatə edir:

"Yazıda Prezident İlham Əliyevin Donald Trampı "sülh adamı" adlandırması, Ermənistanla Azərbaycan arasında sülh prosesinə verdiyi töhfəyə görə ABŞ prezidentinə təşəkkür etməsi, həmçinin əvvəlki ABŞ administrasiyalarının uzun illər ərzində münaqişənin həllindən daha çox onun dondurulmuş vəziyyətdə qalmasına üstünlük verməsi ilə bağlı açıqlamaları yer alıb. Bu paylaşım Donald Trampın cənab prezident İlham Əliyevlə olan dostluq münasibətlərinə göstərdiyi dəyər kimi qiymətləndirmək olar. Son dövrlər Azərbaycan-ABŞ münasibətləri yeni strateji mərhələyə keçid edib.Prezident İlham Əliyevin 2025-ci ilin avqustunda Prezident Donald Trampın dəvəti ilə Vaşinqtona həyata keçirdiyi səfər Azərbaycan-ABŞ münasibətlərinin inkişafında mühüm dönüş nöqtəsi olub. Avqustun 8-də Ağ Evdə keçirilən görüş zamanı Azərbaycan ilə ABŞ arasında Strateji Tərəfdaşlıq Xartiyasının hazırlanması məqsədilə Strateji İşçi Qrupunun yaradılması haqqında Anlaşma Memorandumu imzalandı. Bu sənəd iki ölkə arasında münasibətlərin gələcək inkişaf istiqamətlərini müəyyən edən mühüm siyasi çərçivə formalaşdırmaqla yanaşı həm də əməkdaşlığın yeni mərhələsinin əsasını qoydu.

Bu ilin fevralın 10-da ABŞ-nin vitse-prezidenti Cey. Di. Vensin Azərbaycana səfəri zamanı Azərbaycan Respublikası Hökuməti ilə ABŞ Hökuməti arasında Strateji Tərəfdaşlıq haqqında Xartiyanın imzalanması münasibətlərin strateji səviyyəyə yüksəldilməsinin sübut etdi. Bu gün hər iki ölkə uzunmüddətli, etibarlı və strateji xarakter daşıyan münasibətlərin inkişafında maraqlıdır. Azərbaycan ilə ABŞ arasındakı strateji tərəfdaşlıq və əməkdaşlıq regionda sülhə və sabitliyə xidmət edir. Xüsusilə də ABŞ-nin vasitəçiliyi ilə əldə edilən tarixi sülh sazişləri və irəli sürülən tranzit marşrutları (məsələn, TRIPP dəhlizi) regionda kommunikasiyaların açılmasına və qlobal ticarət yollarının şaxələnməsinə birbaşa töhfə verir. Ümumillikdə isə Azərbaycan-ABŞ arasında mövcud tərəfdaşlıq hər iki dövlətin maraqlarına cavab verməklə yanaşı, Avrasiya məkanında təhlükəsizlik arxitekturasının möhkəmlənməsinə dəstək olur".

Telegramda izləyin