"İnsanlar özlərini başqalarının baxışı ilə görməyə başlayıblar" - PSİXOLOQ

"Əslində, estetik müdaxilələrin hamısını mənfi qiymətləndirmək də doğru deyil. Amma son illərdə müşahidə etdiyimiz tendensiya artıq sağlam seçimdən daha çox sosial təzyiqin və təsdiq ehtiyacının nəticəsinə bənzəyir".

Bu sözləri Sonxeber.az-a psixoloq Samirə Bağırova danışıb.

O, açıqlamasında qeyd edib ki, bu gün estetik müdaxilələrin artması cəmiyyətimizdə təkcə gözəllik məsələsi deyil, həm də psixoloji və sosial problemə çevrilib:

"İnsanlar özlərini başqalarının baxışı ilə görməyə başlayırlar. Əhalisi milyardı keçən ölkələrdə bu hal bir o qədər də gözə çarpmır. Amma əhalisi 10 milyon və ya daha az olan ölkələrdə estetik müdaxilələr daha çox nəzərə çarpır.

Eyni zamanda, sosial media təbii gözəlliyi deyil, filtrlənmiş və standartlaşdırılmış simaları ideal kimi təqdim edir. Nəticədə insanlar öz üzlərini deyil, bir-birinə bənzəyən simalar yaratmağa çalışırlar. Özünü qəbul etməyi öyrənmək əvəzinə, insan hər narahatlığın həllini yeni prosedurda axtarır.

Əslində, cəmiyyət də bu prosesdə böyük məsuliyyət daşıyır. İnsanları şəxsiyyəti, biliyi və dəyərləri ilə deyil, görünüşü ilə qiymətləndirən bir mühit formalaşır. Bu tendensiya psixoloji sağlamlıq və özünü qəbul mövzularında cəmiyyətdə maarifləndirmənin kifayət qədər güclü olmadığını göstərir".

Vüsalə İbrahimli

Telegramda izləyin