İsti havalarda telefonu uzun müddət şarjda saxlamayın - Mütəxəssislərdən xəbərdarlıq

Yay aylarında havaların həddindən artıq isti keçməsi mobil telefonlardan təhlükəsiz istifadə məsələsini daha da aktuallaşdırıb. Telefon təmiri üzrə mütəxəssislər istifadəçilərə cihazlarını uzun müddət şarjda saxlamamağı və saxta batareyalardan istifadə etməməyi tövsiyə edirlər.

Sonxeber.az türk mediasına istinadən xəbər verir ki, onların sözlərinə görə, yüksək temperatur və telefonun uzun müddət şarjda qalması batareyanın şişməsinə, şarj sisteminin nasazlığına və cihazın ümumi işləmə qabiliyyətinin zəifləməsinə səbəb ola bilər.

Mütəxəssislər bildirirlər ki, xüsusilə keyfiyyətsiz və saxta batareyalar ciddi təhlükə yaradır. Batareyanın şişməsi təkcə telefonun sıradan çıxması ilə nəticələnmir, bəzi hallarda partlayış və yanğın riskini də artırır.

Ekspertlər istifadəçilərə telefonu birbaşa günəş şüaları altında saxlamamağı, batareya tam dolduqdan sonra cihazı şarjdan ayırmağı, həmçinin yalnız orijinal və ya sertifikatlaşdırılmış batareya və aksesuarlardan istifadə etməyi tövsiyə edirlər.

Onların fikrincə, bu qaydalara əməl olunması həm mobil telefonun istismar müddətini uzadır, həm də mümkün təhlükələrin qarşısının alınmasına kömək edir.

Telegramda izləyin