Hollivud ulduzu: "Sevgilimi ölümündən dörd il əvvəl itirmişdim"

Amerikalı aktrisa Sandra Bullok uzun müddət həyat yoldaşı kimi birlikdə yaşadığı fotoqraf Brayan Rendallın ağır xəstəliyi və ölümündən sonra keçirdiyi sarsıntıdan danışıb.

Lent.az xarici KİV-ə istinadən xəbər verir ki, 62 yaşlı aktrisa "SmartLess" podkastında Rendallın üç il ərzində amiotrofik lateral sklerozla (ALS) gizli mübarizə apardığını bildirib. Brayan Rendall 2023-cü ilin avqustunda 57 yaşında vəfat edib.

Bullokun sözlərinə görə, Rendall xəstəliyinin ictimaiyyətə açıqlanmasını istəməyib. Aktrisa onun istəyinə hörmət etsə də, ağır sirri xüsusilə COVID-19 pandemiyası dövründə təkbaşına daşımağın özünü təcrid etdiyini söyləyib.

"Mən Brayan üçün ölümündən dörd il əvvəl yas tutmağa başlamışdım. Xəstəlik münasibətimizin yarısını əlimizdən aldı. Sevdiyim insan bədəni dünyadan köçməzdən xeyli əvvəl məni tərk etmişdi", - deyə aktrisa etiraf edib.

Sandra Bullok bu müddətdə iki azyaşlı övladının da yaşananları qəbul etməsinə yardım göstərməyə çalışdığını bildirib. Xüsusilə qızı Layla Brayanı ata kimi gördüyü üçün ailənin vəziyyəti daha da ağır olub.

Aktrisa əvvəlcə diaqnozu yalnız bacısı ilə bölüşüb. Daha sonra yaxın dostları Cennifer Eniston və Amanda Anka da həqiqəti öyrəniblər. Bullok xəstəliyin fiziki əlamətlərinə psixoloji problemlərin də əlavə olunmasını "olduqca qaranlıq bir dövr" adlandırıb.

Brayan Rendallın ölümündən sonra aktrisa fəaliyyətinə fasilə verərək vaxtını övladlarına və mənəvi sağalmasına ayırıb. O, hazırda "Practical Magic 2" filmi ilə yenidən ekranlara qayıtmağa hazırlaşır.

Telegramda izləyin