Hikmət Hacıyev: "Ermənistan gəncləri arasındakı revanşizm bizi narahat edir"

"Ermənistan cəmiyyətində gördüyümüz bəzi məqamlar bizi narahat edir".

Oxu.Az xəbər verir ki, bu fikirləri Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev CAMCA (Mərkəzi Asiya, Monqolustan, Cənubi Qafqaz və Əfqanıstan) Regional Forumunda deyib.

O bildirib ki, revanşist qüvvələr cəmiyyətdə hələ də kifayət qədər üstünlük təşkil edir və fərqli səslər eşidirik:

"Bu arada, digər bir narahatlıq doğuran məqam isə revanşizmin Ermənistan gəncləri arasında fəal olmasıdır. Çünki seçkidə Robert Koçaryan və Samvel Karapetyanın əsas seçici kütləsi Ermənistan gəncləri idi. Təəssüf ki, onlar hələ də revanşizm prizmasından düşünürlər və bu, narahatlıq doğurur. Buna görə də biz Ermənistan hökumətinə də çağırış edirik ki, öz xalqını sülhə hazırlamaq üçün çox ciddi çalışsınlar. Lakin Azərbaycan tərəfinin strateji qətiyyəti var. Sülh gündəliyini davam etdirmək, onu yerdə möhkəmləndirmək və sülh konsepsiyasına əsaslanan elə bir regional memarlıq qurmaq ki, bu, həm Ermənistan, həm də Azərbaycan xalqı üçün uzunmüddətli sülh və sabitliyi təmin edə bilsin. Biz həmişə deyirik ki, bu sülhü yalnız Paşinyan hökuməti ilə, baş nazir Paşinyanla deyil, Ermənistan xalqı ilə bağlamaq istəyirik".

Prezidentin köməkçisi xatırladıb ki, iki ölkə arasında ticarət əlaqələri var:

"Bir neçə il əvvəl təsəvvür belə edilməyən bəzi addımlar yerlərdə icra olunur. Ticarət əlaqələri, biznes münasibətləri, iki ölkə arasında etimadın qurulması tədbirləri və s. Bunlar sülh quruculuğu istiqamətində Azərbaycanın atdığı addımlardır".

Telegramda izləyin