Heyvanlara qarşı zorakılıq artır: Cəzaların sərtləşdirilməsi gündəmdə - VƏKİLDƏN AÇIQLAMA

Bakıda hamilə itin çoxmərtəbəli binanın pəncərəsindən aşağı atılaraq öldürülməsi cəmiyyətdə heyvanlara qarşı zorakılıq məsələsini yenidən gündəmə gətirib. Hadisə ilə bağlı şəxsin saxlanılması və inzibati qaydada cəzalandırılması məsuliyyət məsələsini önə çıxarsa da, əsas sual olaraq qalır: heyvanlara qarşı bu cür qəddarlığın qarşısını almaq üçün mövcud cəzalar kifayət edirmi?

Dünyanın bir sıra ölkələrində heyvanlara işgəncə və ağır zorakılıq daha ciddi hüquqi məsuliyyət yaradır. Bəs Azərbaycanda da heyvanlara qarşı qəddarlığa görə cəzalar sərtləşdirilməlidirmi?
Mövzu ilə bağlı Vəkillər Kollegiyasının üzvü Cavanşir Qasımzadə Sonxeber.az-a açıqlamasında bildirdi ki, bəli, qeyd edilən hal xoşagəlməz haldır və təəssüflər olsunki, heyvanlara qarşı belə işgəncə və ya onlara qarşı bu cür rəftar ilk hal deyil və tez-tez rast gəlirik. Sosial medianın geniş yayılması ilə bu cür videoları tez-tez görürük və bu cür xəbərləri tez-tez eşidirik.

Azərbaycanda belə hərəkətləri tənzimləyən qanunvericilik İnzibati Xətalar Məcəlləsidir. Məcəllənin 274-cü maddəsində heyvanlara qarşı rəhmsiz rəftar qeyd olunur. Bu maddəyə görə həm cərimə, həm də xəta törədən şəxsin şəxsiyyəti nəzərə alınmaqla bir aya qədər inzibati həbs nəzərdə tutulub.

Cərimə 500 manatdan başlayır və 2000 manata qədər çıxa bilir. İnzibati həbs isə bir aya qədərdir.

Lakin dünya təcrübəsinə baxdıqda görürük ki, bir çox ölkələrdə belə hərəkətlərə qarşı daha ağır sanksiyalar və tədbirlər nəzərdə tutulub. İnzibati Xətalar Məcəlləsinin 274-cü maddəsi digər ölkələrlə müqayisədə daha yumşaqdır və kifayət qədər çəkindirici xarakter daşımır.

Düzdür təzəlikcə bu maddədə dəyişiklik olundu və ağırlaşdırıldı. Əvvəllər sadəcə 500 AZN cərimə tətbiq olunurdu, sonradan maddə sərtləşdirildi və inzibati həbs də əlavə edildi. Lakin görürük ki, bu belə, çəkindirici xarakterə malik deyil.

Müəllif: İlkin Məmmədkərimov

Telegramda izləyin