ABŞ-İran müharibəsi: Yeni zərbələr ehtimalı və atəşkəs danışıqları gündəmdə

ABŞ ilə İran arasında hərbi qarşıdurmanın yenidən genişlənməsi ehtimalı və müharibənin dayandırılması istiqamətində diplomatik səylər diqqət mərkəzindədir. Hörmüz boğazının açılması, ABŞ-ın İrana qarşı mümkün yeni hərbi əməliyyatları və sanksiyalarla bağlı fikir ayrılıqları regionda vəziyyətin qeyri-müəyyən qalmasına səbəb olur.

Sonxeber.az Reuters-ə istinadən xəbər verir ki, ABŞ rəsmiləri müttəfiq ölkələrə mümkün yeni zərbələrin bir neçə gün davam edə biləcəyi barədə xəbərdarlıq ediblər. Bununla belə, Donald Trampın yeni hərbi əməliyyatlarla bağlı yekun qərar vermədiyi bildirilir.

İranın xarici işlər naziri Abbas Əraqçi isə vasitəçilərlə təmasların davam etdiyini və Tehranın diplomatik həllə imkan verməyə hazır olduğunu açıqlayıb. İran Hörmüz boğazının yeddi gün ərzində açılmasını nəzərdə tutan planın müzakirəsini davam etdirir.

ABŞ administrasiyasının müharibəyə çəkdiyi xərc də artır. Reuters-in Pentaqonun qiymətləndirməsinə əsaslanan məlumatına görə, ABŞ-ın İrandakı müharibəyə çəkdiyi xərc 47 milyard dolları ötüb. Bu məbləğə istifadə olunmuş sursatların əvəzlənməsi və itirilmiş hərbi texnikanın xərcləri də daxildir.

Beləliklə, hazırda münaqişənin gələcəyi həm diplomatik təmaslardan, həm də Vaşinqtonun mümkün yeni hərbi əməliyyatlarla bağlı qərarından asılıdır. Atəşkəs razılaşmasının əldə olunması barədə hələlik təsdiqlənmiş məlumat yoxdur.

Müəllif: İlkin Məmmədkərimov

Telegramda izləyin