Rusiya Ukraynada 26 nəfəri öldürdü - ABŞ yeni sülh danışıqlarına hazırlaşır

Rusiya və Ukrayna arasında davam edən müharibədə növbəti ağır hücum qeydə alınıb. Rusiyanın Ukraynanın Zaporojye vilayətində humanitar yardım məntəqəsi kimi istifadə olunan binaya endirdiyi hava zərbələri nəticəsində azı 26 nəfər həlak olub, bir neçə nəfər yaralanıb.

"Al Jazeera"nın məlumatına görə, hücuma məruz qalan bina Komışuvaxa kəndində yerləşən və əvvəllər məktəb kimi fəaliyyət göstərən obyekt olub. Müharibə səbəbindən tədrisin dayandırıldığı binadan yerli sakinlərə humanitar yardım paylanması və sığınacaq kimi istifadə edilirdi. Ukrayna Prezidenti Vladimir Zelenski hücumu pisləyərək bunun Rusiyanın gərginliyi azaltmaq niyyətində olmadığını göstərdiyini bildirib.

Bu arada, ABŞ Rusiya və Ukrayna arasında yeni üçtərəfli danışıqların keçirilməsinə hazırlaşır. ABŞ Prezidentinin xüsusi nümayəndəsi Stiv Uitkoffun açıqlamasına görə, görüşlər noyabrın 10-11-də Birləşmiş Ərəb Əmirliklərinin paytaxtı Əbu-Dabidə baş tutacaq.

Sonxeber.az Reuters-ə istinadən xəbər verir ki, danışıqlarda müharibənin dayandırılması, Ukraynanın müharibədən sonrakı təhlükəsizliyinin təmin edilməsi, humanitar məsələlər və hərbi gərginliyin azaldılması müzakirə olunacaq. ABŞ-ı görüşlərdə Stiv Uitkoff və Cared Kuşnerin təmsil etməsi gözlənilir.

Bundan əvvəl ABŞ nümayəndələrinin Brüsseldə Fransa, Almaniya, Böyük Britaniya, Avropa İttifaqı və NATO təmsilçiləri ilə görüşərək Ukraynanın təhlükəsizlik təminatlarını və ölkənin bərpasına iqtisadi dəstəyi müzakirə etməsi planlaşdırılıb.

Bununla belə, Moskva və Kiyevin mümkün sülh razılaşmasının şərtləri ilə bağlı mövqeləri arasında ciddi fərqlər qalır. Qarşıdakı danışıqların müharibənin dayandırılması istiqamətində hansı nəticəni verəcəyi hələlik məlum deyil.

Müəllif: İlkin Məmmədkərimov

Telegramda izləyin