Çin Filippinə xəbərdarlıq etdi: Cənubi Çin dənizində gərginlik yenidən artır

Çin və Filippin arasında Cənubi Çin dənizi ilə bağlı ərazi mübahisəsi yenidən diplomatik gərginliyə səbəb olub. Pekin Manilanı mübahisəli dəniz əraziləri ilə bağlı açıqlamalarında və addımlarında ehtiyatlı olmağa çağırıb. Çin Xarici İşlər naziri Vanq Yi Filippinin xarici işlər naziri Tereza Lazaro ilə telefon danışığı zamanı iki ölkə arasındakı münasibətlərə kənar müdaxilələrin olduğunu iddia edib və Filippin tərəfinə xəbərdarlıq edib.

"The Washington Post"un Associated Press-ə istinadən yaydığı məlumata görə, Vanq Yi iki ölkə arasındakı münasibətlərin bəzi filippinli siyasətçilərin müdaxiləsi ilə üzləşdiyini bildirib. Çinli nazir Manilanı həmin şəxslərə qarşı daha sərt mövqe tutmağa və Pekinlə münasibətlərdə vahid siyasət yürütməyə çağırıb. O, həmçinin Filippinin Cənubi Çin dənizi məsələsində açıqlamalarına və davranışlarına diqqət yetirməli olduğunu vurğulayıb.

Filippinin xarici işlər naziri Tereza Lazaro isə telefon danışığını səmimi və konstruktiv müzakirə kimi qiymətləndirib. Onun sözlərinə görə, tərəflər fikir ayrılıqlarının qarşılıqlı hörmət əsasında və diplomatik dialoq yolu ilə idarə olunmasının vacibliyini vurğulayıblar.

Qeyd edək ki, Çin və Filippin uzun müddətdir Cənubi Çin dənizindəki bir sıra ərazilər üzərində qarşılıqlı iddialar irəli sürürlər. Son illərdə bu mübahisələr hərbi gəmilərin toqquşması və dənizçilər arasında fiziki qarşıdurmalarla müşayiət olunub. Bölgə beynəlxalq ticarət marşrutları baxımından da strateji əhəmiyyət daşıyır.

Sonxeber.az The Washington Post-a istinadən xəbər verir ki, görüş zamanı tərəflər Reed Bank ərazisində neft və qaz yataqlarının birgə kəşfiyyatı ilə bağlı uzun müddətdir dayandırılmış danışıqların bərpası məsələsini də müzakirə ediblər. Həmin ərazi Filippinin müstəsna iqtisadi zonasına daxil olsa da, Pekin də bu bölgəyə iddia edir.

Bununla belə, tərəflər mövcud fikir ayrılıqlarına baxmayaraq, diplomatik əlaqələri və danışıqları davam etdirmək barədə razılığa gəliblər.

Müəllif: İlkin Məmmədkərimov

Telegramda izləyin