Britaniya müdafiə və süni intellekt sahəsində Çindən asılı vəziyyətə düşüb: Milli təhlükəsizlik risk altındadır

Böyük Britaniyanın müdafiə sənayesi, süni intellekt infrastrukturu və bərpaolunan enerji sektoru üçün zəruri olan kritik mineralların tədarükündə Çindən asılılığı ciddi təhlükə kimi qiymətləndirilib.

Sonxeber.az The Guardian-a istinadən xəbər verir ki, Britaniya parlamentinin Biznes, innovasiya, elm və ticarət komitəsi ölkənin kritik xammal təchizatında Çindən asılılığının milli təhlükəsizlik üçün risk yaratdığı barədə xəbərdarlıq edib.

Məlumata əsasən, Çin dünyanın nadir torpaq elementlərinin emalının 80 faizindən çoxuna nəzarət edir. Bu minerallar hərbi təyyarələrin, elektrik avtomobillərinin, batareyaların və süni intellekt texnologiyalarının istehsalında mühüm əhəmiyyət daşıyır.

Parlament komitəsi hesab edir ki, Çin bu xammalın ixracını məhdudlaşdıracağı təqdirdə Britaniyanın müdafiə imkanları və texnoloji inkişafı ciddi problemlərlə üzləşə bilər.

Hesabatda bildirilir ki, 2030-cu ilə qədər litiuma tələbat 45 dəfə, nadir torpaq elementlərinə tələbat isə 16 dəfə arta bilər.

Komitə hökumətə kritik mineralların yerli istehsalını, emalını və təkrar emalını genişləndirməyi, alternativ təchizat mənbələri yaratmağı və müttəfiq ölkələrlə əməkdaşlığı gücləndirməyi tövsiyə edib.

Britaniya hökuməti isə 2035-ci ilə qədər kritik minerallara olan tələbatın 10 faizini daxili istehsal, 20 faizini təkrar emal hesabına təmin etməyi hədəfləyir.

Beləliklə, məsələ təkcə iqtisadi asılılıq deyil, həm də Britaniyanın müdafiə sənayesi və texnoloji müstəqilliyi baxımından strateji əhəmiyyət daşıyır.

Müəllif: İlkin Məmmədkərimov

Telegramda izləyin