Konstitusiyanın qəbulundan sonra Azərbaycanın inkişaf modelində nə dəyişdi? - AÇIQLAMA

"1995-ci ildə qəbul olunmuş Konstitusiya müstəqil Azərbaycanın tarixində ilk fundamental konstitusiya sənədidir. Həmin vaxta qədər ölkədə qüvvədə olan Konstitusiya sovet dövrünün Konstitusiyası əsasında müəyyən dəyişikliklər və düzəlişlər edilməklə formalaşdırılmışdı. Təbii ki, bu sənəd müstəqil Azərbaycan dövlətinin inkişafı, təhlükəsizliyi, tarixi və ictimai-siyasi münasibətlərinin bütün aspektlərini əhatə edə bilmirdi. Bu, müəyyən mənada təbii idi, çünki Azərbaycan yeni müstəqillik əldə etmiş dövlət idi. Lakin 1995-ci ildə Heydər Əliyevin rəhbərliyi ilə müstəqil Azərbaycanın dövlətçilik tarixinə, müasirliyinə və gələcək inkişafına uyğun məzmunu özündə əks etdirən Konstitusiya qəbul edildi".

Bu fikirləri Sonxeber.az-a açıqlamasında siyasi şərhçi Aydın Quliyev bildirib.

"Bu Konstitusiyanın qəbulu Azərbaycanın həm daxili inkişaf modelinin, həm xarici siyasət konsepsiyasının, həm də vətəndaşların hüquq və azadlıqlarının müəyyənləşdirilməsi baxımından çərçivə sənədi rolunu oynadı. İlk növbədə, ölkənin xarici siyasətinin çoxşaxəli və milli təhlükəsizlik maraqlarına uyğun istiqamətdə qurulmasının əsasları müəyyənləşdirildi. Vətəndaşların fundamental hüquq və azadlıqlarının təsbit olunması da Konstitusiyanın mühüm əhəmiyyət daşıyan aspektlərindən biri idi. Eyni zamanda, hakimiyyət bölgüsü prinsipi və hakimiyyətin əsas mənbəyinin xalqın iradəsi olduğunun bəyan edilməsi bu sənədin başlıca məziyyətlərindən sayılırdı.

İlk dəfə olaraq Konstitusiyada müstəqil Azərbaycanın Azərbaycan Xalq Cümhuriyyətinin varisi olduğu və onun tarixi ərazilərinin bir hissəsində təşəkkül tapdığı qeyd edildi. Bunun dövlətçilik tariximiz baxımından böyük əhəmiyyəti var idi.

Bundan başqa, həmin Konstitusiyada separatizmlə əlaqələndirilən Dağlıq Qarabağ anlayışının konstitusion çərçivədən kənarda qalması da mühüm məqam kimi qiymətləndirilə bilər. Ümumilikdə, 1995-ci ildə qəbul olunmuş Konstitusiyanın bir sıra baxımdan mühüm dövlət sənədi hesab edilməsi üçün ciddi əsaslar var. Sonrakı dövrlərdə dövlətçilik prosesləri dərinləşdikcə yeni reallıqlara uyğun olaraq Konstitusiyaya müəyyən dəyişikliklər də edildi. Bununla belə, müstəqil Azərbaycanın ilk Konstitusiyası 1995-ci ildə qəbul olunmuş sənəddir".

Röyalə Xəyal

Telegramda izləyin