Avropa lideri Ukraynanı NATO-ya dəvət etdi

"Ukrayna NATO-da mühüm rol oynayır və alyansda tamhüquqlu yerini tutmalıdır".

Oxu.Az xəbər verir ki, bunu Fransa Prezidenti Emmanuel Makron "X" sosial şəbəkəsindəki paylaşımında bildirib.

O, həmçinin Parisin tərəfdaşları ilə birlikdə Ukrayna ərazisində ədalətli və davamlı sülhün təmin olunmasına çalışdığını qeyd edib.

"Məqsədimiz aydındır: Ukraynada ədalətli və davamlı sülhə nail olmaq, daha sonra isə Avropada ümumi təhlükəsizlik çərçivəsini gücləndirmək üçün bütün tərəflərlə işi davam etdirmək. Ukrayna NATO-da mühüm rol oynayır və alyansda özünə layiq tamhüquqlu yerini tutmalıdır", - deyə Makron vurğulayıb.

Xatırladaq ki, daha əvvəl Ukrayna Prezidenti Volodimir Zelenski danışıqlar zamanı ABŞ nümayəndələrinin Kiyevdən NATO-ya üzvlük müqabilində Donbasdan qoşunlarını çıxarıb-çıxarmayacağını soruşduqlarını açıqlayıb. Onun sözlərinə görə, belə bir sual ilk dəfə səsləndirilib.

Zelenski, həmçinin Ukraynanın konstitusiyasında neytral statusun təsbit edilməsinə razı olmayacağını bildirib. O hesab edir ki, bu, ölkəyə uzunmüddətli təhlükəsizlik təminatları verməyəcək. Prezident əlavə edib ki, Ukrayna hazırda da NATO üzvü deyil və neytral statusun konstitusiyada təsbit edilməsi ölkənin mövcud vəziyyətini dəyişməyəcək.

Telegramda izləyin