Bakıda məktəbdə baş vermiş kütləvi dava ilə bağlı RƏSMİ AÇIQLAMA

Bakı şəhəri, Qaraçuxur qəsəbəsindəki 214 saylı orta məktəbdə şagirdlər arasında kütləvi dava olması ilə bağlı Bakı Şəhər Təhsil İdarəsi məlumat yayıb.

İdarədən Sonxeber.az-ın sorğusuna cavab olaraq bildirilib ki, baş vermiş hadisə barədə şagirdlərin valideynləri dərhal məlumatlandırılıb, onlarla müvafiq söhbət aparılıb və zəruri tövsiyələr verilib.

Məlumatda qeyd edilib ki, hər 2 şagird fiziki cəhətdən aktiv uşaqlardır. Onların bundan öncə də mübahisə etdikləri müşahidə olunub. Tərbiyə işləri üzrə direktor müavini, məktəbin praktik psixoloqu və sinif rəhbəri həmin şagirdlərlə müntəzəm olaraq tərbiyəvi iş aparır və psixoloji yardım edirlər. Şagirdlərin münasibətlərinin tənzimlənməsi istiqamətində müvafiq işlər davam etdirilir.

"Noyabrın 3-də hər iki şagird məktəbə gəlib və dərs məşğələlərində iştirak ediblər. Hər iki məktəblinin təlim nəticələri orta, dərsə davamiyyəti və davranışı normaldır. Məsələ ilə bağlı Bakı Şəhəri üzrə Təhsil İdarəsi tərəfindən müvafiq araşdırma aparılır".- BŞTİ-dən bildirilib.

Qeyd edək ki, 214 nömrəli tam orta məktəbdən Bakı Şəhər Təhsil İdarəsinə verilmiş məlumatda bildirilib ki, noyabrın 2-də tənəffüs zamanı (saat 12:15-də) 7a sinif şagirdləri Neman Fərzəliyev və Əkbər Məmmədli mübahisə edib və onlar arasında dava nəticəsində Əkbər Məmmədlinin qasıq hissəsində kəskin ağrılar yaranıb. Məktəb rəhbərliyi tərəfindən təcili tibbi yardım çağırılıb.

Aysel Kərimova

Telegramda izləyin