Əmtəə nişanlarının qiymətləndirilməsinə başlanıldı

"Patent və Əmtəə Nişanları Mərkəzi" publik hüquqi şəxsi tərəfindən əmtəə nişanlarının qiymətləndirilməsinə başlanılıb.

Sonxeber.az xəbər verir ki, bu barədə Trend-ə Standartlaşdırma, Metrologiya və Patent üzrə Dövlət Komitəsindən məlumat verilib.

Əmtəə nişanının qiymətləndirilməsi hansı hallarda faydalıdır?

Nizamnamə kapitalının artırılması zamanı, yəni qeyri-maddi aktiv kimi əmtəə nişanına olan hüquq nizamnamə kapitalını formalaşdıra bilər;

Əmtəə nişanına olan hüququn alqı-satqısı zamanı qiymətin əsaslandırılması məqsədilə;
Biznesin bütünlüklə satılması zamanı əmtəə nişanının qiymətləndirilməsi vacib əhəmiyyət kəsb edir;
Əmtəə nişanından istifadəyə dair lisenziya və françayzinq müqavilələrinin bağlanması zamanı royaltinin dərəcəsini müəyyən etmək məqsədilə;

Saxta mal və xidmət göstərildiyi zaman vurulmuş zərərin əvəzinin müəyyənləşdirilməsi məqsədilə;
Müəssisə tərəfindən kredit alınması zamanı əmtəə nişanın girov qoyulması məqsədilə;

Biznesin idarə edilməsi və vergitutmanın optimallaşdırılması məqsədilə. Bu, rəhbərlərə mülkiyyətdən effektiv istifadə etməyə və marketinq qərarları qəbul etməyə kömək edir.

Müəssisələrin yenidən təşkili zamanı qovuşan və birləşən hüquqi şəxslərin aktivlərinin dəyərləndirilməsi məqsədilə əmtəə nişanına hüququn qiymətləndirilməsi zəruridir.

Əqli mülkiyyətə əsaslanan kreativ iqtisadiyyatın davamlı inkişafının zəruriliyi və bununla əlaqədar ölkənin ÜDM-də onun payının artırılması üzrə tədbirlərin həyata keçirilməsinin vacibliyi məhz intellektual mülkiyyət obyektlərinin qiymətləndirilməsi standartının hazırlanması və tətbiqini qaçılmaz edən əsas amillərdəndir.

Əqli mülkiyyət obyekti hüquq sahibinə illər keçdikcə daha çox qazanc gətirmək qabiliyyətinə malikdir. Əmtəə nişanına mülkiyyət hüququ qeyri-maddi aktiv olduğu üçün qiymətləndirmə rəyi ilə müəyyən edilmiş dəyər mühasibat uçotunda əks olunur və gələcəkdə biznesin qiymətləndirilməsi, satılması, kredit və ssuda alınması, investorlar və potensial partnyorların cəlb edilməsi zamanı həlledici rol oynaya bilər. Əmtəə nişanına hüququn qiymətləndirilməsi bir çox hallarda həm də işgüzar nüfuzun göstəricisi hesab olunur.

Patent və Əmtəə Nişanları Mərkəzi əmtəə nişanı üzərində hüquq sahiblərini bu xidmətdən yararlanmağa dəvət edir.

Telegramda izləyin