Bakının orta məktəbində BİABIRÇILIQ: Həyətində yas çadırı quruldu - FOTO

Bakıda orta məktəbin idman meydançasında qurulan yas çadırı narazılığa səbəb olub.

Hadisə Binəqədi rayonu ərazisində yerləşən 299 saylı orta məktəbdə baş verib. Yaranmış vəziyyət valideynlər və şagirdlər tərəfindən birmənalı qarşılanmayıb. Redaksiyamıza foto göndərən valideynlərdən biri yaranmış durumdan şikayətçi olduğunu bildirib.

Məsələyə aydınlıq gətirmək üçün 299 saylı orta məktəbin direktor təlim-tərbiyə işləri üzrə müavini Elyana xanımla ilə əlaqə saxladıq. Məktəb rəsmisi yas çadırının icazə əsasında qurulduğunu söyləsə də, bu icazənin kimdən və ya harsı qurumdan alındığı barədəməlumat verməkdən imtina etdi.

"Məktəb yaxınlığında yerləşən evlərdən birində yas düşüb. Ailənin cavan övladı dünyasını dəyişib. Yas çadırı qurmaq üçün isə yer yox idi. Bu səbəbdən də bizə müraciət etdilər. Biz də bunun üçün onlara şərait yaratdıq".

Baş verənlərlə bağlı GoldNews.Az-la fikirlərini bölüşən təhsil üzrə ekspert Kamran Əsədov orta məktəblərin inzibati ərazi vahidi daxilində dini məzmunlu, etnik, irqi formalı mərasim, tədbir keçirlməsinin qanuna zidd olduğunu qeyd edib.

"Bəzi hallarda - dövlət əhəmiyyətli hadisə baş verdikdə, dövlətçiliyə, təhsilə xüsusi xidmətləri olan şəxslərin son vida mərasimi təhsil müəssisələrində keçirilə bilər. Amma heç bir halda məktəbdə yas mərasimi, yas çadırı qurula bilməz. İlk növbədə ona görə ki, bu görüntü şagirdlərdə psixoloji sarsıntı, ruh düşkünlüyü yarada bilər. Bundan əlavə, yas mərasimində yüksək səslə dini ayinlərin icrası tədrisin keyfiyyətinə təsir göstərə bilər. Həm də məktəbin həyətində təhlükəsizlik aşağı səviyyəyə düşər. Düşünürəm ki, buna imkan vermək olmaz. Təhsil haqqında qanunda, orta məktəblərin nümunəvi nizamnaməsində bunlar xüsusi olaraq qeyd olunub".

Telegramda izləyin

instagramda izləyin