Gürcüstan, Ukraynadan sonra MDB-dən çıxacaq növbəti ölkə: Azərbaycan ola bilərmi?

Rusiya və Ukrayna arasında yaranmış Krım münaqişəsindən, eyni zamanda Moskvanın bu ölkədəki separatizmi dəstəkləməsindən sonra Kiyev MDB-də fəaliyyətini faktiki olaraq dayandırıb.

Bunu Sonxeber.az-a politoloq Elçin Mirzəbəyli Ukraynanın nümayəndələrini MDB-də bütün nizamnamə orqanlarından geri çağırması barədə qərarını və Azərbaycanın bu təşkilatda fəaliyyətini şərh edərkən deyib.

Onun sözlərinə görə, bu baxımdan indiki şəraitdə Ukraynanın atdığı addımlar sadəcə prosedual qaydalardan irəli gəlir: "Ukrayna ncədən xəbərdarlıq edib və hazırda proses həyata keçirilir, yeni bir hadisə baş verməyib".

Azərbaycanın Gürcüstan, Ukrayna kimi MDB-dən çıxa biləcəyi ehtimalına toxunan politoloq bildirib ki, MDB-də təmsil olunmaq Azərbaycan qarşısında hansısa müstəsna öhdəliklər qoymur və ölkənin suveren hüquqlarını məhdudlaşdırmır: "Bu baxımdan Azərbaycanın MDB-ni tərk etməsi üçün əhəmiyyətli amil görmürəm. İstənilən qurumu tərk etmək asan məsələdir. Lakin ilk növbədə nəzərə almaq lazımdır ki, təşkilatdan çıxmaq Azərbaycana nə verəcək".

E. Mirzəbəyli diqqətə çatdırıb ki, MDB çərçivəsində bir sıra istiqamətlərdə faydalı əməkdaşlıqlar mövcuddur: "Təşkilat ən azından koordinasiya məsələlərində, humanitar sahədə əməkdaşlığa müəyyən töhfələr verir. MDB-nin gələcəkdə Avropa İttifaqı modeli kimi quruma çevriləcəyini gözləyənlərin ümidləri çin olmadı və bunun baş verməsi də mümkün deyil. Ukraynanın verdiyi qərar etiraz xaralkterli bir addımdır və ölkənin milli maraqlarından irəli gəlir".

Onun sözlərinə görə, hazırda Rusiyanın MDB-yə alternativ layihələri var: " Bunlara Avrasiya İqtisadi İttifaqı, Kollektiv Təhlükəsizlik Müqaviləsi Təşkilatı və Gömrük İttifaqını misal göstərmək olar. Azərbaycan bu təşkilatların heç birində təmsil olunmayıb, çünki prioritetlər fərqlidir. Ancaq MDB-də təmsil olunmaq ölkəmiz üçün hansısa problem yaratmır və siyasi təsir altında birləşmə anlamına gəlmir".

Gürcüstan, Ukraynadan sonra MDB-dən çıxmağa növbəti namizəd ölkəyə gəlincə, politoloq bunu proqnozlaşdırmağın çətin olduğunu vurğulayıb: "Əgər Rusiyanı MDB məkanında ən böyük dövlət qəbul etsək, bütün MDB məkanında inteqrasiya modellərinin Moskva tərəfindən həyata keçirildiyini nəzərə alsaq, indiki şəaitdə MDB Rusiya üçün o qədər də prinsipial əhəmiyyət kəsb etmir. Rusiya digər inteqrasiya modellərinə üstünlük verir. Daha əvvəl də qeyd etdiyim kimi bunlar Avrasiya İqtisadi İttifaqı, Gömrük İttifaqı və Kollektiv Təhlükəsizlik Müqaviləsi Təşkilatıdır. Bu və ya digər dövlətin MDB-dən çıxması Rusiyanın maraqlarına hansısa formada təsir göstərmir. MDB sadəcə əməkdaşlıq modelidir. Regionda oxşar əməkdaşlıq modelləri kifayət qədər çoxdur. MDB-ni hansısa dövlətin tərk edib-etməməsindən asılı olmayaraq, bu, qurumun fəaliyyətində dəyişikliyə gətirib çıxarmayacaq. Təşkilatən fəaliyyəti konkret sahələr üzrə əməkdaşlığı nəzərdə tutur. MDB-də fundamental ciddi strukturlaşma prosesi baş verməyib. Bundan sonra da bu qurumu hansısa dövlətin tərk edəcəyi barədə proqnoz vermək istəməzdim. Tərk etsə də, etməsə də MDB-də heç nə dəyişməyəcək, çünki bu, siyasi, hərbi təşkilat deyil və hansısa dövlətin üzərində məsuliyyət qoymur".

Məftun Salmanov

Telegramda izləyin