Azərbaycanda işıqlar söndü, Alov Qüllərində erməni bayrağı əks olundu

Xəbər verdiyimiz kimi, iyulun 3-nə keçən gecə Mingəçevir İstilik Elektrik Stansiyasında (İES) qəza baş verib. Nəticədə stansiyanın enerji bloklarından birinin fəaliyyəti dayanıb və ölkə ərazisində ciddi enerji problemi yaranıb. Bundan əlavə də iyul ayının 3-də, saat 20:30 radələrində Gəncə Şəhər İcra Hakimiyyətinin başçısı Elmar Vəliyev və onun mühafizəçisi Qasım Aşbazova İcra Hakimiyyətinin inzibati binasının qarşısında odlu silahdan atəş açılıb. İcra başçısı və mühafizəçisinə atəş açan şəxs 1983-cü ildə Gəncə şəhərində anadan olmuş Yunis Səfərovdur. Bu hadisələr baş verən zaman şəhərin mərkəzində yerləşən alov qüllələrində erməni bayrağının rəngləri dalğalanıb. Bütün bunlarda mənfur düşmənimiz olan erməninin əli ola bilərmi?

Məsələ ilə bağlı deputat Zahid Oruc BiG.AZ-a açıqlama verib. O bildirib ki, Mingəçevirdə baş verən partlayış hadisəsi ilə bağlı yaradılmış dövlət komissiyasının verdiyi məlumatlar, dövlət orqanlarının hər birindən gələn açıqlamalar onu göstərdi ki, orada təxribat izləri mövcud deyil:

"Əgər kənar müdaxilə və qara əllərin izi olsaydı, bu, heç bir zaman gizlədilməzdi. Cəmiyyətə də bu barədə məlumat verilərdi. İnsanlar qaranlıqda qaldıqlarına və hərəkət məhdudiyyəti olduğuna görə fərqli reaksiya verərdilər. Bundan əlavə mühüm hakimiyyət orqanın təmsilçisinə qarşı atılan güllələr heç bir halda bəraət ala bilməz. Ağır məsuliyyət yaradan hadisədir. Həmin insanın ətrafında müxtəlif obrazlar yaratmaq, 90-cı illərin Gəncə qiyamının tərkib hissəsi kimi vermək qiymətləndirmək düzgün deyil.

Deputat bildirib ki, Alov Qüllələrində erməni bayrağının dalğalanması videosundan xəbərdardır:

"Sözügedən görüntülərə mən də baxdım. O rənglər erməninin adına tikilməyib və beynəlxalq aləmdə də rənglər bölünməyib. Biz baş verən hadisələrdə terror izlərini axtarmaqdansa çalışmalıyıq ki, buna qədər olan nizamı və düzəni qoruyub saxlayaq. Başa düşürəm, hər birimiz baş verən hadisə ilə bağlı dövlətimizin gördüyü yüksək tədbirləri müdafiə edirik. Unutmamalıyıq ki, biz artıq 90-cı illərin böhranından çıxmışıq. Əminəm ki, bu cür hadisələrin bir daha təkrarlanmaması üçün yüksək tədbirlər görüləcək. Amma hər birimizin də vətandaş anlayışımız vacibdir. O, qaranlıqdan zülmətə aparan fikirlərlərlə tanış olanda təəssüf hissi keçirdim. Bu hadisə bir mövcud problemləri ortaya çıxardı. Alternativ enerji ilə bağlı xüsusi addımlar atılmalıdır. Düzdür, ermənilər hər yolla ölkəmizə zərbə vurmaq istəyirlər. Azərbaycanın hüquq mühafizə orqanları kifayət qədər güclüdür. Hər dəfə olduğu kimi bu gün də dövlətimizə etibar edək".

Telegramda izləyin