"İmzalanan Memorandum tarixi, strateji və iqtisadi əhəmiyyət kəsb edir" - DEPUTAT
"Türkmənistanla enerji sahəsində imzalanan Anlaşma Memorandum tarixi və iqtisadi əhəmiyyət kəsb edir".
Bunu yanvarın 21-də Aşqabad şəhərində imzalanan "Azərbaycan Respublikası Hökuməti ilə Türkmənistan Hökuməti arasında Xəzər dənizində "Dostluq" yatağının karbohidrogen resurslarının birgə kəşfiyyatı, işlənməsi və mənimsənilməsi haqqında Anlaşma Memorandumu" ilə bağlı fikirlərini Sonxeber.az-la bölüşən deputat İqbal Məmmədov bildirib.
Deputat qeyd edib ki, cənab Prezidentin rəhbərliyi ilə Azərbayanın neft-qaz prioritetinin əsas hədəfləri də məhz Xəzəryanı ölkələr arasında əməkdaşlığın dəstəklənməsindən ibarətdir:
"Bu anlaşma Azərbaycan-Türkmənistan arasında strateji əməkdaşlığın inkişafından xəbər verir.
Düşünürəm ki, imzalanan memorandum bundan sonra da ölkələrimizi və xalqlarımızı birləşdirəcək. Bu, eyni zamanda nəinki iki ölkə, həmçinin region ölkələri, dünya ölkələri arasında yeni əməkdaşlıq, dostluq əlaqələrinin möhkəmlənməsinə yol açacaq.
Əlbəttə, bununla yanaşı, bu anlaşmanın strateji və iqtisadi əhəmiyyəti var. Çünki imzalanan anlaşma sayəsində həmin "Dostluq" yatağındakı enerji resurslarının hasil edilməsi və dünya bazarına çıxarılması bu iki ölkənin gəlirlərinin artmasına səbəb olacaq. Təbii ki, bu anlaşmadan hər iki ölkə iqtisadi baxımdan yararlanacaq. Eyni zamanda bu, əməkdaşlıq platformasıdır".
Deputat vurğulayıb ki, ikitərəfli müzakirələrin nəticəsi olaraq, yatağın birgə işlənməsi ilə bağlı razılığın əldə edilməsi Xəzərin statusu müəyyənləşdikdən sonra formalaşmış əməkdaşlığın güclənməsindən xəbər verir:
"İmzalanmış Memoranduma əsasən, yatağın "Dostluq" adlandırılması iki ölkə arasında dostluğun, qardaşlığın, qarşılıqlı əlaqələrin həm də tarixi etnik-dini ənənələrə söykənməsinin bariz nümunəsidir. Bu mənada memorandumun imzalanması tarixi hadisədir, həmçinin, Azərbaycanın neft-qaz strategiyasının inkişafında böyük əhəmiyyətə malikdir. Yataqdan hasil olunacaq neft və qaz Azərbaycanın mükəmməl şəkildə qurulan infrastrukturu, ixrac kəmərləri vasitəsilə daşınacaq. Bu da Azərbaycanın nəqliyyat-tranzit potensialının möhkəmlənməsinə yeni imkanlar yaradacaq və tranzit ölkə kimi əhəmiyyətini artıracaq.
Qeyd edim ki, bu Memorandumun imzalanması eyni zamanda Azərbaycanın neft-qaz strategiyasının inkişafında böyük əhəmiyyətə malikdir. Bu sənəd Xəzər dənizi regionunda enerji və nəqliyyat-kommunikasiya layihələrinin həyata keçirilməsinə və xarici investorların bu layihələrə cəlb edilməsinə, habelə Azərbaycanın nəqliyyat-tranzit potensialının möhkəmlənməsinə yeni imkanlar yaradır. Odur ki, razılaşmanın əldə edilməsi Xəzər dənizinin sülh, mehriban qonşuluq və dostluq dənizi olmasını möhkəmləndirir və Xəzər dənizində əməkdaşlıq və qarşılıq etimad mühitinin gücləndirilməsinə töhfə verir.
Bundan əlavə, Azərbaycan da həmin yataqda olan enerji resurslarının birgə işlənməsi və dünya bazarına çıxarılması məsələsində dövlət gəlirlərini artırmaq imkanı qazanacaq və eyni zamanda tranzit ölkə kimi mövqeyini gücləndirəcək. Azərbaycanda son 20 ildə formalaşan infrastruktur imkan verəcək ki, "Dostluq" yatağından hasil olan neft və qazın dünya bazarına çıxarılması təmin olunsun. Bu baxımdan sözügedən anlaşma strateji əhəmiyyət daşıyır".
Aysel Yusifqızı
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş