AzTV Mübariz İbrahimov haqqında FİLM ÇƏKİR - FOTO-VİDEO

Azərbaycan Televiziyası hər zaman milli vətənpərvərlik ruhununun təbliğinə yönəlmiş filmlərin və verilişlərin hazırlanmasına böyük önəm verib. 44 günlük Vətən müharibəsi zamanı və sonrakı dövrdə ərazi bütövlüyümüzün bərpası uğrunda qəhrəmancasına döyüşərək şəhid və qazi olan igid oğullarımızın tanıdılması ilə bağll hazırlanan veriliş, sənədli film və layihələri buna misal göstərmək olar.

Sonxeber.az-ın verdiyi məlumata görə, Azərbaycan Televiziyasının növbəti belə layihəsi igidliyi və qorxmazlığı ilə qəhrəmanlıq dastanı yazan və 5 saat ərzində təkbaşına döyüşərək, düşmənə qan udduran Milli Qəhrəmanımız Mübariz İbrahimova həsr olunub.

"Mübariz" adlanan filmin ssenari müəllifi Nicat Əjdər, quruluşçu rejissoru Natiq Novruzov, quruluşçu operatorları Fahir Səmədoğlu və Anar Dadaşovdur. Baş rollarda Xalq artisti Şamil Süleymanov (Mübarizin atası), Flora Hüseynova, Mehman İbadov, Riqlay Əlisoy (balaca Mübariz) və başqaları çəkilirllər.

Nicat Əjdər qəhrəmanın uşaqlıq dövründən başlayaraq, onun şəhidlik zirvəsinə ucaldığı günə qədər uzanan şərəfli həyat yolunu qələmə alıb. Ssenari müəllifinin sözlərinə görə, film Mübarizin keçdiyi yoldan, ataya, anaya, bacıya, qardaşa, Vətənə bağlılığından, Azərbaycana olan sevgisindən bəhs edir.

Filmin rejissoru Natiq Novruzov, öz növbəsində, vurğulayıb ki, Azərbaycan Televiziyası şəhid və qazilərə daim ehtiramla yanaşır və bu işdə də məqsədi vətənpərvər gəncləri yetişdirməkdir.

Mübariz İbrahimovun atası rolunda çəkilən Xalq Artisti Şamil Süleymanov və qəhrəmanın uşaqlığını canlandıran Riqlay Əlisoy filmdə yer almaqlarıyla fəxr etdiklərini bildiriblər.

Süjet xətti əsasən Mübarizin qəhrəman kimi böyüməsinə səbəb olan amilləri əks etdirir. Belə ki, onun qəhrəmanlıq tarixi 5 yaşından yazılmağa başlayır. Bu dövrdə Azərbaycan Birinci Qarabağ döyüşlərini yaşayıb və balaca Mübariz hərbçilərin necə, gözlərini qırpmadan, Vətən uğrunda şəhadət zirvəsinə ucaldıqlarının şahidi olub.

Bir neçə gün davam edəcək çəkilişlər Bakıətrafı qəsəbələr, Biləsuvar və Tərtər rayonlarında aparılacaq. 90 dəqqəlik ekran əsəri yeni mövsümün əvvəlində təqdim olunacaq.

Natəvan Baxşiyeva

Telegramda izləyin