"Kinoteatrların açılması təqdirəlayiq olar" - DEPUTAT

Artıq iki ilə yaxındır ki, ölkəmizdəki pandemiya səbəbindən tamaşaçılar teatr, kinoteatr və konsert zallarına həsrət qalıblar. Hər sahədə, az da olsa, yumşalmalar var, hətta toy məclislərinin keçirilməsinə, iri ticarət obyektlərinin açılmasına icazə verilib, lakin nədənsə kinoteatrlar və teatrların açılması heç müzakirə mövzusu da deyil. Bundan zərər çəkən isə təkcə orada çalışan işçilər, aktyorlar deyil, həm də tamaşaçılardır.. Axı teatr və kinoteatrlar bizim asudə vaxtımızı səmərəli keçirmək üçün gedəcəyimiz ən ideal məkanlardır.

Məsələ ilə bağlı deputat Müşfiq Cəfərov Sonxeber.az-a bildirib ki, kinoteatrlar açılsa, gənclər yay mövsümündən səmərəli istifadə edə bilərlər:

"Ümumiyyətlə, kinoteatrların açılma məsələsi son vaxtlar müzakirəyə səbəb olur. Nəzərə alaq ki, "mall"lar artıq açılıb, restoranlar fəaliyyətinə davam edir, toylara icazə verilir. Düzdür, bununla yanaşı, yoluxma sayı adamı qorxudur, amma digər tərəfdən də, vaksinasiya prosesi də davam edir. Hesab edirəm ki, bu prosesin davam etməsi, o cümlədən iaşə obyektlərinin işləməsi onu göstərir ki, həyat davam edir.

Düşünürəm ki, kinoteatrların açılması təqdirəlayiq olar. Kinoteatrda məsafəni qorumaq, təhlükəsizliyi ciddi şəkildə təşkil etmək daha asandır. Çünki kinoteatrlarda daha fərqli oturacaqlardan istifadə etmək, tamaşaçıları 1,5 m məsafə ilə oturdub təhlükəsizliyi qorumaq olar.

Kinoteatrlara daha çox gənclər üz tuturlar. Universitetlərin, məktəblərin bağlı olmasından istifadə edərək, onlar kinoteatrlarda vaxtlarını daha dəyərli keçirə bilərlər".

Zaira Akifqızı

Telegramda izləyin