"Patı"nın yayılmasının qarşısını almaq üçün nə edilməlidir? - AÇIQLAMA

Zamanın bəlasına çevrilən "patı", eyni zamanda "şüşə" adı ilə tanınan narkotik vasitə digər maddələrdən daha təhlükəlidir. İlk istifadədən asılılıq yaradan bu maddənin yayılmasının qarşısını almaq üçün hansı tədbirlər görülür? Patı ilə bağlı bilmədiyimiz nələr var?

Mövzu ilə əlaqədar Sonxeber.az-a Musa Quliyev açıqlama verib.

O vurğulayıb ki, bu narkotik vasitəsinin yayılmasının kökünü axtarıb tapmaq lazımdır:

"Çox təəssüf ki, "patı" adı ilə tanınan metamfetamin Azərbaycanda son dövrlərdə çox ciddi şəkildə yayılıb. Müxtəlif yaş qruplarını əhatə edən, hətta məktəblilər arasında da bunu istifadə edənlər var. Bu, süni narkotik vasitədir. Hesab edirəm ki, hüquq mühafizə orqanları lazımi səviyyədə öz işlərini qurublar və həmin narkotik satıcılarını tez-tez aşkar edir, cəmiyyətə də göstərib, cəzalandırırlar.

Mənim düşüncəmə görə, mübarizə tədbirləri 3 istiqamətdə aparılmalıdır. Polis və digər hüquq mühafizə orqanları öz işlərini görürlər və davam etməlidirlər. Eyni zamanda, kütləvi informasiya vasitələrində, xüsusən sosial şəbəkələrdə maarifləndirmə işləri daim aparılmalıdır. Sosial şəbəkələri ona görə xüsusi qeyd edirəm ki, hazırda gənclər televiziya və qəzetlərdən çox, məhz sosial şəbəkələrdən informasiya alırlar. Buna baxmayaraq, televiziya və qəzetlərdə də təbliğat getməlidir".

Deputat bildirib ki, insanlar öz qonşularında, yaxınlarında narkotik vasitəni paylayanı, satanı, istifadə edəni görsələr, həmin anda ifşa edib polisə də məlumat verməlidirlər:

"Üçüncü istiqamət isə budur ki, ictimaiyyət də bu işdə çox fəal şəkildə polisin dəstəkçisi olmalıdır. İctimaiyyətin nümayəndələri, o cümlədən qeyri-hökumət təşkilatları daim müxtəlif tədbirlər keçirməli, təbliğatlar aparmalıdırlar. Kompleks şəkildə bir yanaşma getməlidir. Eyni zamanda, hər bir valideyn də öz övladını qorumalıdır. Məktəblər qısa müddətdə açılır, burada həm müəllimlər, həm valideyn şurası bu məsələni çox ciddi nəzarətə götürməlidir.

Ümumiyyətlə, sintetik narkotiklər ağır fiziki asılılıq yaradır və bundan yaxa qurtarmaq çox çətindir. Ona görə də profilaktik tədbirlər kompleks şəklində davam etməlidir və ictimaiyyət bu işdə fəal olmalıdır".

Aysel Səfərzadə

Telegramda izləyin