Bakıda film kimi hadisə: Hamilə arvadı öldü, "məhkəməni" özü qurdu - İSTİNTAQ MATERİALLARI

2020-ci il oktyabrın 4-də Suraxanı rayonu, Hövsan qəsəbəsində hərəkətdə olan BMW markalı avtomobil eyni istiqamətdə hərəkət edən digər avtomobillə toqquşur.

İlk baxışda adi qəza kimi xarakterizə edə bilərdik, amma qəza faciə ilə nəticələnir. Bu faciə isə sürücülərdən birinə ikiqat mənəvi zərbə vurur...

BMW-dəki sürücü və qadın ər-arvaddır (Vüsal və Xatirə: şərtidir)...

Bu məsələ sonralar bıçaqlanma hadisəsinə qədər gəlib çıxır, Vüsal onun avtomobilini vuran şəxsi tapıb onun kürəyinə bıçaq saplayır.

Sonxeber.az "oxu.az"a istinadən istintaq materialları əsasında həmin cinayət hadisəsinin səbəblərini təqdim edir...

Vüsal bıçağa əl atan deyildi, o, səbirli, təmkinli idi. Vüsal bu yol qəzasını bəlkə də onun alnına yazılan tale, qismətlə əlaqələndirir.

Bəs onun emosiyalarını coşduran nə idi?

Vüsal və Xatirə 2020-ci ilin martında ailə həyatı qurublar, bu izdivacdan doğulacaq övladlarını həyəcanla gözləyirlər. Yol qəzası baş verəndə Xatirə yeddi aylıq hamilə olub, bu yol qəzası onun və bətnindəki körpənin həyatına son qoyur.

Hadisə ilə bağlı təhqiqat aparılır, Vüsal da taleyi ilə barışıb ədalət mühakiməsini gözləyir.

Vüsal səbir edir, dözür, amma istintaqın işindən və nəticənin çıxarılmasının gecikməsindən narahatlıq keçirir.

Suraxanı Rayon Polis İdarəsinin İstintaq Şöbəsində aparılan araşdırma yubanır və Namiq (digər sürücü - şərtidir) məsuliyyətə cəlb edilmir. Namiq bu azmış kimi Vüsalla da maraqlanmır.

Gedişatdan narazı qalan Vüsal qərara gəlir ki, Namiqə "məhkəməni" özü qursun.

Vüsal 2021-ci ilin fevralın 1-də Sadıqcan küçəsi ilə fikirli halda addımlayarkən gözü bir nəfərə sataşır və dayanır, sən demə onun gördüyü şəxs Namiqdir.

Namiq isə onu görmür, Vüsal oradan uzaqlaşır, evinə gedir və qərarını qətiləşdirir: "Namiqi özüm cəzalandıracağam".

Fevralın 7-də mətbəx bıçağını götürüb Namiqi gördüyü yerə gedir. Gecə saat 01:30-da çoxmərtəbəli yaşayış binasının giriş qapısının yanında dayanan Namiqə yaxınlaşır.

Namiq həmin ərazidə mühafizəçi işləyirmiş. O, Vüsalı tanımır, ondan nə lazım olduğunu soruşur. Vüsal isə xəstə olduğunu, ona kömək etməsini "xahiş edir".

Namiq ona yardım etmək istəyir, qabaqda gedir, arxasınca da Vüsal. Namiq qəfildən kürək nahiyəsində zərbə hiss edir, bədənindən qan axdığını görür. Vüsal ikinci bıçaq zərbəsini vurmaq istəsə də, Namiq özünü müdafiə edə bilir. Vüsal ərazidən uzaqlaşır.

İstintaq zamanı tərəflər arasında barışıq olmur.

Məhkəmə bu ilin avqustunda Vüsal haqqında hökm çıxarıb.

Hökmə əsasən, Vüsal Cinayət Məcəlləsinin 128-ci maddəsi ilə (qəsdən sağlamlığa yüngül zərər vurma) maddəsi ilə təqsirli bilinərək üç ay müddətinə azadlıqdan məhrum edilib.

Telegramda izləyin