"Müsabiqələr fotoqraflara daha da gözəl kadrlar yaratmaq üçün stimuldur" - Elvin Abdulla

Heydər Əliyev Mərkəzi, "Regional İnkişaf" İctimai Birliyi (RİİB), Medianın İnkişafı Agentliyi (MEDİA), Media Təhlil Mərkəzi (MTM) və Azərbaycan Fotoqraflar Birliyinin (AFB) təşkilatçılığı ilə "Vətən müharibəsi - qələbənin simaları" adlı fotomüsabiqə başlayır.

Məqsəd 44 günlük Vətən müharibəsində Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin rəhbərliyi ilə rəşadətli Azərbaycan Ordusu tərəfindən torpaqlarımızın işğaldan azad olunması zamanı yaşanmış hadisələri, zabit və əsgərlərimizin döyüş tapşırıqlarını yerinə yetirərkən qəhrəmanlıqlarını fotolar vasitəsilə geniş ictimaiyyətə bir daha çatdırmaqdır.

Sonxeber.az-a açıqlama verən Dövlət Gömrük Komitəsinin fotoqrafı Elvin Abdulla müsabiqələrin tez-tez keçirilməsini müsbət dəyərləndirdiyini söyləyib:

"Ölkəmizdə həqiqətən fotoya marağı olan insanlar çoxdur. İşin təəssüfləndirici tərəfi budur ki, bu maraqlara zamanında düzgün yön verilmədiyi üçün istedadı olan əksər insanlar çıxdıqları yoldan geri dönürlər. Məhz bu nüanslara görə belə müsabiqələrin tez-tez keçirilməsini müsbət dəyərləndirirəm. Zənnimcə, müsabiqələr həm yeni başlayan, həm də foto işində öz sözünü deyən fotoqraflara daha da gözəl kadrlar yaratmaqları üçün stimuldur. Həmçinin, gələcəkdə Azərbaycanda fotoqrafiyaya dəstək fonunda daha böyük layihələrin də gerçəkləşməsi arzuolunan hal olardı".

Aysel Səfərzadə

Telegramda izləyin