Dölün hipoksiyasında XALQ TƏBABƏTİ reseptləri

Dölün hipoksiyası əksər hamilələrə qoyulan yayılmış diaqnozlardan biridir. Doğuşdan sonra həmin diaqnoz 10-15 faiz hallarda təsdiqlənsə də, həkimlər onun acı nəticələrinin qarşısını hələ hamiləlik dövründə almağa çalışırlar.

Dölün hipoksiyası toxumaların kifayət qədər oksigenlə təchiz olunmaması və ya onun natamam mənimsənilməsi nəticəsində yaranır.

Orqanizm enerji hasil etmək üçün qida maddələrindən və havadakı oksigendən istifadə edir və həzm sistemi, tənəffüs orqanları, qan-damar sistemi və ifrazat orqanları bunun üçün fəaliyyət göstərir. Ana bətnində olan dölün orqan və sistemləri tam formalaşmadığına görə həyati vacib maddələrin hamısı ananın qanından alınır. Ana ilə döl arasında mübadilənin pozulması bətndaxili aclığa, həmçinin oksigen aclığına səbəb olur.

Hipoksiyanın inkişafına səbəb olan faktorlar hamiləlik müddətində və doğuş zamanı dölün oksigenlə zəif təchizatına səbəb ola bilər. Dəmirdefisitli anemiya, plasentar çatışmazlıq və plasenta qan dövranının zəifləməsi, doğuşun gecikməsi nəticəsində plasentanın qocalması, alkoqol və tütünün təsirindən cift qan dövranının zəifləməsinə daha çox rast gəlinir. Bunlarla yanaşı ananın ürək-damar xəstəlikləri, keçirdiyi stress və əsəb gərginlikləri, hestozlar, dölyanı mayenin çox olamsı, çoxdöllü hamiləlik, dölün hemolitik xəstəliyi və infeksiyalar da hipoksiyaya aparıb çıxaran amillər sayılır.

Dölün hipoksiyasının diaqnostikasında USM və dopler müayinəsindən istifadə olunur. USM-də dölün ana bətnində yerləşməsi, dölyanı mayenin bulanıqlıq dərəcəsi, plasentanın yetişmə dərəcəsi və fəaliyyətinin dərəcəsi, dopler müayinəsi isə plasenta və dölün qan dövranı barədə məlumat əldə etməyə yardım edir.

Bundan əlavə gələcək ana orqanizmində gedən dəyişikliklərə əsasən vaxtında bətnindəki körpənin oksigen aclığını hamiləliyin 20-ci həftəsindən sonra, yəni döl hərəkətləri hiss olunanda müəyyən edə bilər. Xüsusilə də dölün hərəkətliliyinin birdən-birə azalması qısa zamanda həkimə müraciət etməyə əsas verir. Dölün ürək vurğularının sayı və ritmi də daimi həkim nəzarətində olmalıdır.

Müalicə

Hipoksiyanın müalicəsi ağırlıq dərəcəsindən asılı olaraq ev şəraitində və stasionarda aparıla bilər. Müalicənin ilkin mərhələsində oksigen inhalyasiyası, venadaxili qələvi məhlullar təyin olunur, daha ağır hallarda antikoaqulyantlar tətbiq edilir.

Təbii üsullarla müalicəyə başlamamışdan əvvəl müalicə həkimi ilə məsləhətləşmək və bitkilərə qarşı allergiyanın olub-olmamasını müəyyən etmək lazımdır.

RESEPTLƏR

Cincilim dəmləməsi

1-2 xörək qaşığı cincilim otu termosa tökülür, üzərinə 1 stəkan qaynar su əlavə olunur və 8-10 saat dəmlənir. Alınan dəmləmə süzüldükdən sonra gündə 3-4 dəfə yeməkdən əvvəl 1/4 stəkan qəbul edilir.

Tozağacı şirəsi

Şirəni almaq üçün yaz vaxtı tozağacının gövdəsi çərtilir və damcılayan şirənin altına qab qoyulur. Toplanan şirə gündə 3 dəfə 1-2 xörək qaşığı yeməkdən əvvəl qəbul olunur.

Ballı şərbət

1 çay qaşığı təbii bal 1 stəkan ilıq suda həll edilir və səhər acqarına qurtum-qurtum içilir. Şərbətə 1 çay qaşığı təbii alma sirkəsi də əlavə etmək olar. Müalicə 10 gündən artıq aparılmamalıdır, çünki balın uzun müddət qəbulu allergiyaya səbəb ola bilər.

Şəfa vitamini

Şəfa vitamini gündə iki dəfə səhər və günorta 1-2 xörək qaşığı qəbul olunur. Şəfa vitamininin təbii komponentləri həm antioksidantlarla zəngin olduğundan dölün qan dövranına müsbət təsir edir, həm də tərkibində olan dəmirin hesabına anemiyanın inkişafının qarşısını alır.

Yerkökü şirəsi

Hər səhər acqarına və ya səhər yeməyindən 1 saat sonra yerkökü şirəsi içilir. Onu qəbul etməzdən əvvəl 1 xörək qaşığı bitki yağı ilə qarışdırmaq tövsiyyə olunur.

Hipoksiyanın nəticələri

Hamiləliyin erkən dövrlərində baş verən oksigen aclığı daxili orqanların düzgün formalaşmamasına və dölün inkişafdan qalmasına səbəb olur. Son aylarda dölün oksigen təchizatının pozulması isə vaxtından əvvəl doğuşa, doğuş fəaliyyətinin anomaliyalarına, hətta dölün məhvinə də səbəb ola bilər. Ona görə də hipoksiya aşkar olunan kimi müalicə olunmalı və onun ağırlaşmalarının qarşısı alınmalıdır.

Profilaktika

Dölün hipoksiyasının profilaktikası düzgün həyat tərzinin aparılması ilə əlaqədardır. Gələcək ana rasional qidalanmalı, təmiz havada gəzməli və stresdən uzaq olmalıdır.\saglamolun.az

Telegramda izləyin