"Biz artıq müasir Azərbaycanı qürurla dünyaya təqdim edirik"- Deputat

İstiqamət: Azərbaycanın dövlətçilik tarixinin, milli adət-ənənələrinin, elm və mədəniyyətinin təbliği: dövlət müstəqilliyimizin bərpasının 30-cu ili - Azərbaycan dövlətçiliyi müasir mərhələdə

"Bir dövlətin müstəqil olması üçün bir çox şərtlər vacibdir. Dünyada 4 minə yaxın xalq, 200-dən artıq dövlət var. Azərbaycan o xoşbəxt xalqlardandır ki, dövləti var. Müstəqillik anlamına gəldikdə isə, hətta 200-dən artıq dövləti müstəqil dövlət kimi qeyd etsək də, daha dərin baxdıqda onların bir çoxunda müstəqillik üçün vacib olan elementlərin mövcud olmadığını görərik. Məsələn, qonşumuz olan düşmən Ermənistan bu qəbildəndir. Özünü müstəqil dövlət adlandırır, amma ən vacib məsələlərdən biri ölkənin sərhədlərinin mövcud olması, qorunmasıdır, bu dövlətin sərhədlərini isə digər bir ölkənin hərbi sistemi qoruyur. Həmçinin, Ermənistanın böyük iqtisadi gəlir gətirəcək şirkətlərinə başqa ölkə nümayəndələri başçılıq edir".

Bu sözləri Sonxeber.az-a açıqlama verən deputat Vüqar İsgəndərov deyib.

Onun sözlərinə görə, biz müasir Azərbaycanı daha da inkişaf etmiş şəkildə gələcəkdəki nəsillərə əmanət edəcəyik:

"Azərbaycanın dövlətçilik ənənələri qədimdən mövcuddur. Biz müstəqilliyimizi 1918-ci ildə Azərbaycan Xalq Cümhuriyyəti formasında yaratdıq və bu, Şərqdə ilk demokratik dövlət kimi tarixə düşdü.

Ondan sonrakı dövrdə Azərbaycanın SSRİ-nin tərkibində olub və 1991-ci ildə Konstitusiya aktı ilə 1918-ci ildə qazandığı müstəqilliyi bərpa edib.

Biz artıq 18 oktyabrı Müstəqilliyimizin bərpası günü kimi qeyd edirik. Bu, məfhum olaraq, milli identifikasiyanın, özünüdərkin çox vacib elementlərindən biridir. Bizdə Azərbaycançılıq ideologiyası var. Xalqımız vətənpərvərdir, Vətəninə bağlıdır. Azərbaycan artıq dövlətçilik ənənələri formalaşan ölkələrdəndir, mahiyyəti böyüyüb və bu gün həm bölgədə, həm qitədə yeni geosiyasi, geoiqtisadi reallıqlar yaradan dövlətdir. Azərbaycan Respublikasının Prezidenti dünyanın ikinci ən böyük təşkilatı olan Qoşulmama Hərəkatının sədridir.

Bunların hər biri Azərbaycan dövlətinin gücünü göstərən amillərdəndir.

Ermənistan 28 ilə yaxın Azərbaycan torpaqlarını işğal altında saxlayıb. Beynəlxalq hüquqa hörmət əlaməti olaraq, BMT-nin qəbul etdiyi 44 qətnaməyə, ATƏT-in Minsk Qruplarının həmsədrlərinin beynəlxalq hüquq və norma prinsiplərinə əməl olunacağını və məsələnin həll ediləcəyini səbirlə gözlədik. Lakin gördük ki, beynəlxalq hüquq və qanunlar bir çox dövlətlərin özləri üçün yaranan sistemdir. Onlar bundan özlərinə lazım olanda istifadə edirlər.

Nəhayət, Azərbaycan beynəlxalq hüquqi ədaləti özü, Ali Baş Komandanın rəhbərliyi altında ordusunun gücü, xalqın birliyi ilə bərpa etdi və bununla həm iqtisadi gücünü, həm də insan kapitalının qüdrətini dünyaya göstərmiş oldu.

Artıq işğaldan azad olanan ərazilərdə böyük quruculuq işləri gedir. Yeni kəndlər, şəhərlər salınır, infrastruktur qurulur. Bunun həm sürəti, həm miqyası, həm əzəməti bütün dünyanı heyran qoyur. Belə işlərin bu cür sürətlə görülməsi dünyanın əksər dövlətləri üçün əlçatmazdır. Bu reallığı ölkəmiz və Azərbaycan Prezidenti yaradıb. İndi yeni, müasir Azərbaycan dünyaya təqdim olunur. Biz qürurla deyirik ki, azərbaycanlıyıq.

Dünyada düzən dəyişir, bir çox yeni dəyərlər meydana çıxır. Beynəlxalq mədəniyyət, tolerantlıq, xalqların dostluq və qarşılıqlı anlaşma şəklində yaşaması da ali dəyərlərdəndir. Bugünkü Azərbaycan da bunların hər birini qürurla dünyaya təbliğ edir".

Material Azərbaycan Respublikası

dəstəyi ilə hazırlanmışdır.

Aytəkin CƏLALİ

Telegramda izləyin

instagramda izləyin